Ужо ў верасні-кастрычніку бягучага года персанал пакіне будынак ведамственнай клінікі, якая раней знаходзілася на балансе Беларускай Чыгункі.

Зачыніць шпіталь -  ініцыятыва Міністэрства аховы здароўя. Робіцца гэта дзеля “аптымізавання сістэмы выдаткаў на ўтрыманне клінік”. З аднаго боку, аказваецца нерэнтабельнасць, прысутнасць свабодных “койка-месцаў” і працоўных месцаў для персанала ў іншых шпіталях. З другога – калектыў, удзячныя пацыенты і ўдалыя хірургічныя аперацыі.

За год тут лячылася каля трох с паловай тысячаў чалавек. Сюды траплялі  цяперашнія  работнікі і ветэраны чыгункі, таксама  жыхары горада, якім тэрмінова патрабавалася хірургічная дапамога. 

Зараз  хворых  будуць размяркоўваць па іншых лякарнях гораду. Належнае хірургічнае абсталяванне ёсць толькі ў шіталі хуткай медыцынскай дапамогі, Абласным клінічным шпіталі і 4-ым гарадскім шпіталі.

Чыноўнікі абяцаюць, што персанал без працы не застанецца, абсталяванне размяркуюць па паліклініках і амбулаторыях.

Галоўным прэтэндэнтам на будынак шпіталю з’яўляўецца медуніверсітэт, які плануе перарабіць былую чыгуначную лякарняю ў студэнцкі інтэрнат. Хаця сам будынак, які мае ўжо больш за 200 год, першапачаткова закладваўся выключна як шпіталь.

Гарадзенскі чыгуначны шпіталь не першы, які зачыняць ў краіне. Падобнае ўжо адбылося ў мінулым годзе ў Воршы, Менску і Баранавічах. І толькі ў Менску будынак шпіталю выкарыстоўваецца па прызначэнню: тут адчынены геранталагічны цэнтр.

Надзея Завіноўская