26 красавіка.

Пачатак кампаніі пратэсту па выратаванні Старой Горадні: 20-хвілінны флэш-моб на Старым мосце, які паводле планаў рэканструкцыі будзе пашыраны да чатырох палос руху. Удзельнікі акцыі вывесілі расцяжку “Не губіце Гродна” і  павязалі чырвоныя стужкі. Па словах удзельнікаў акцыі, яны сімвалізуюць жыццё і барацьбу грамадзкасці за гістарычную спадчыну Гародні.

29 красавіка.

Акцыя ў абарону двухпавярховага жылога дома ХІХ стагоддзя, які ўжо пачынаюць разбіраць. На будынку, які знаходзіцца ў 15 метрах ад КДБ, моладзь прыладзіла расцяжку са словамі “СТОП, ВАНДАЛЫ “ і расставіла свечкі.

1 траўня.

Гарадзнескія актывісты распачалі акцыю па зборы подпісаў у абарону горада. Сабраныя подпісы разам з заявай будуць накіраваны ў абласную пракуратуру з нагоды ”рэканструкцыі “ старой часткі горада. У заяве ўзгадваюцца пералічаныя парушэнні заканадаўства ў галіне аховы культурнай спадчыны.

2 траўня.

Першы вулічны канфлікт. Каля сінагогі пачаліся будаўнічыя працы - пракапалі траншэі, пачалі  працу бульдозеры. Каля 10 моладзевых актывістаў сталі на іх шляху, яны ж выклікалі міліцыянтаў, каб зафіксаваць факт парушэння ахоўнай зоны. Міліцыянты адмовілася складаць пратакол, спаслаўшыся на тое, што яны дзейнічаюць у адпаведнасці з прамым загадам ўладаў. Калі бульдозер ізноў пачаў працу, моладзь паспрабавала спыніць яго. ”Міліцыянеры пачалі адпіхваць нас, штурхалі нават цяжарную дзяўчыну, а другой моцна скруцілі рукі” - кажа відавочца Валеры Руселік. Затрымалі 5 чалавек, карэспандэнта радыё “Свабода“ Міхаіла Карневіча прымусілі знішчыць фотаздымкі зробленыя пад час сутычкі. Затрыманых выпусцілі без складання пратаколаў.

3 траўня.

Прадстаўнікі гарадзенскай інтэлігеныцыі выступілі з заявй аб стварэнні ініцыятыўнай групы па арганізацыі мясцовага рэферэндума. На ім будуць узняты пытанні аб рэканструкцыі старой часткі горада.

Падрыхтавала MaRia Нагаева.

Фота Алеся Залеўскага