У зыходзячым годзе пераразлік працоўных пенсій праводзіўся двойчы (у верасні і ў лістападзе), у сярэднім на 8-9% штораз. На першы погляд, гэта нямала, але ж калі ўлічваць тое, што прырост індэксу спажывецкіх коштаў складае прыкладна 5%, гэтыя змены ў пенсіях амаль непрыкметныя. На сеньняшні дзень сярэдняя пенсія складае 345,3 тыс. рублёў. Сярэдні пенсіянер аддае 150 тыс. рублёў на аплату камунальных паслуг, каля 50 тыс. рублёў – на лекі. У выніку застаецца толькі 145 тыс. рублёў на тое, каб мала-мальскі забяспечваць сябе. Вось што гавораць самі пенсіянеры:

Аляксандра Васільеўна (60 год):”На адной пенсіі выжыць вельмі цяжка, амаль немагчыма. Але ўзрост і здароўе не дазваляюць знайсці працу, вось і прыходзіцца жыць на 300 тысяч у месяц. Пенсіі растуць, але растуць і цэны…”

Кацярына Іванаўна (60 год): “Усе гэтыя змены ў пенсіях ніяк не дапамагаюць. Адзіная магчымасць выжыць сёння – гэта знайсці працу, пабочны заробак. Я працую начальнікам цэха паглыбленай пераапрацоўкі мяса і апрэч пенсіі атрымліваю 800 тысяч рублёў. Праца цяжкая, адымае шмат сіл, таму я спадзяюся, што ў наступным годзе пенсіі вырастуць на столькі, што можна будзе нарэшце выйсці на заслужаны адпачынак”.

Сяргей Іванавіч (67 год): “З пачатку года мая пенсія павялічылася на 40 тыс. рублёў, але ў цэлым гэта нічога не змяніла. Як я працаваў, так і працую, таму што без зарплаты магчымасці жыць паўнавартасным жыццём няма. На жаль, канешне”.

Нам нічога не застаецца дабавіць, акрамя  пажаданняў: мы спадзяемся, што ў 2008 годзе розніца паміж прыростам у пенсіях і прыростам у цэнах будзе больш прыкметнай. І ў карысць першых, канешне.