Невядомым застаецца лёс некаторых гістарычных будынкаў у старой частцы Гародні. Ахвярамі “рэканструкцыі” могуць стаць будынкі на вуліцах Сацыялістычнай 44, Урыцкага 21, 12, 5, 15, Гараднічанскай 23. Была нават інфармацыя, што яны ўжо прызначаныя на знос! Гісторык Янка Лялевіч кажа пра лёс дамоў.

- Вам што-небудзь вядома пра лёс гэтых будынкаў?

- Не, дакладна сказаць анічога не магу. Ці на самой справе яны будуць зьнесеныя ўладамі, ці будуць выстаўленыя на аўкцыён, а зьнішчаць іх потым будучыя ўладальнікі. А можа, іх на самой справе адновяць.

            - Адновяць у якім сэнсе?

            - Гэта звычайная практыка для Эўропы – пабудовы, што маюць гістарычную каштоўнасьць, але знаходзяцца ў дрэнным стане, аднаўляюцца вельмі простым чынам. Захоўваецца тое, што можна захаваць, астатняе будуецца нанова. Але тут ёсьць два моманты: па-першае, будынкі, пра якія ідзе размова, на самой справе таньней проста адрамантаваць, чым будаваць новыя. Па другое, прабачце за рэзкія словы, але ж мы не Эўропа. Я маю на ўвазе, што няма гарантыяў, што ўвогуле будзе нешта будавацца на тым месцы, а калі й будзе, то зусім не абавязкова, што праз колькі год не прыйдзецца рабіць тую ж самую аперацыю з ужо новай пабудовай.

            - Значыць, мы можам лічыць іх помнікамі архітэктуры?

            -Так, яны зьяўлюцца помнікамі, канешне ж, у пэўнай ступені. Паасобку яны можа й не такія цікавыя, але яны ствараюць ансамбаль – частку старога гораду. Гэта не датычыць будынку па вуліцы Сацыялістычнай. Будынак у стылі мадэрн з элементамі дэкору на фасадзе. Менавіта фасад і мае найбольшую каштоўнасьць.

            Кожны, хто пройдзе па вуліцы Урыцкага, ўбачыць, што рэканструкцыя ідзе поўным ходам. Будаўнікі кажуць, што дамы будуць прададзены на аўкцыёне. Але продаж гістарычнага помніку не заўсёды ідзе яму на карысьць. Далёка за прыкладамі хадзіць ня трэба - даволі толькі ўспомніць гісторыю з флігелем.

Андрэй Шыдловіч