На днях найвышэйшы заканадаўчы орган аб’яднанай Еўропы -  Еўрапарламент - выступіў з афіцыйнай заявай, у якой асуджаеццца праграма рэканструкцыі будынкаў гістарычнага цэнтра Горадні і заклік да мясцовых уладаў спыніць такія дзеянні. За час усёй кампаніі «Выратуем Гародню» гэта, бадай, першы выпадак, калі за абарону гарадзенскіх будынкаў бярэцца інстытуцыя такога ўзроўню. Ці могуць паўплываць чыноўнікі з Брусэлю на чыноўнікаў з Горадні ў справе «рэканструкцыі» - з гэтым пытаннем мы звярнуліся да вядомых гарадзенскіх журналістаў, гісторыкаў і грамадскіх дзеячаў.

Павал Мажэйка, прэс-сакратар кандыдата ў прэзыдэнты Беларусі Аляксандра Мілінкевіча падчас выбарчай кампаніі:

- Гэтая заява – гэта чарговае пацверджанне таго, што шмалікія пратэсты гарадзенцаў, неабыякавых грамадзянаў з іншых рэгіёнаў і краінаў далі свой плён. Больш таго, лічу, што ўзняццё пытання на такім высокім узроўні – адзіны рэальны наш шанец паўплываць на дзеянні ўладаў. Нашыя чыноўнікі баяцца санкцый, баяцца, калі агучваюцца іхныя імёны... Таму, думаю, чыноўнікаў гэта схіліць да пераасэнсавання сваіх дзеянняў.

Натальля Макушына, журналіст, адна з аўтарак альманаху «Горад Святога Губерта»:

- Безумоўна паўплывае! Гэта ж не пустое выказванне еўрапейскіх палітыкаў, а канкрэтнае ўказванне на парушэнне канкрэтных міжнародных нормаў у галіне аховы гістарычнай спадчыны. Таксама важна ўсведамляць гэты факт у сукупнасці з іншымі пратэстамі гарадзенцаў, жыхароў іншых рэгіёнаў… Усё гэта стварае адзін вялікі «прэс» на нашых чыноўнікаў, што ўрэшце прымусіць іх прыслухацца да праціўнікаў сённяшняй «рэканструкцыі».

Андрэй Пачобут, карэспандэнт «Gazety Wyborczej»:

- Безумоўна, гэта пазітыўны факт. Гэта паказвае, што пытанне аб знішчэнні гарадзенскай гісторыі неабыякава Еўропе. Але, па-першае, на жаль, ніякіх рэальна эфектыўных рычагоў уплыву на беларускія ўлады Еўропа сёння не мае. А па-другое, гарадзенскія чыноўнікі здолелі паказаць вышэстаячым чыноўнікам з Менску грамадскую кампанію “Выратуем Гародню” як кампанію палітычную. А гэта значыць, што і адносіны да гэтай праблемы будуць адпаведныя: ігнараванне.

Андрэй Вашкевіч, гісторык, адзін з аўтараў альтэрнатыўнага плану транспартнай сістэмы Горадні:

- Адна заява аніяк не паўплывае на нашых чыноўнікаў. Я лічу, што змены ў паводзінах уладаў наступяць толькі тады, калі гарадзенская грамадскасць заручыўшыся падтрымкай еўрапейскай супольнасці прапануе канкрэтную альтэрнатыву той рэканструкцыі, якую праводзяць сёння ўлады. Без канкрэтных нашых прапановаў такія заявы будуць насіць толькі фармальны характар.

Алесь Краўцэвіч, доктар гісторыі, складальнік мапы гістарычнай часткі Горадні:

- Гэтая заява будзе мець плён. Бо найгоршае ў гэтай сітуацыі для нашых чыноўнікаў – гэта розгалас. І як бы яны не спрабавалі рабіць выгляд, што іх не цікавяць меркаванні гарадзенскай, а тым больш міжнароднай супольнасці, ім вельмі цяжка, вельмі боязна прымаць рашэнні, якія могуць яшчэ больш пагоршыць іхні вобраз.

Кацярынка Бычак, актывістка кампаніі “Выратуем Гародні”:

- На сённяшні момант я не веру, што гэта будзе мець плён. Нашаму чынавенству ўсё роўна меркаванне нейкіх там арганізацый. Нашае чынавенства слухае толькі тых, хто плаціць грошы і з’яўляецца іх “крышай” у іх жа дзеяннях. Гэтая заява будзе мець уплыў на звычайных жыхароў Горадні. Бо, калі такія арганізацыі як Еўрапарламент і Юнэска зацікавіліся “рэканструкцыяй па-гарадзенску”, то значыць і сапраўды гэтая праблема носіць востры грамадскі характар, а не “палітычны”.

Апытваў Зміцер Цвікевіч