Чарговы раз Гродна з усім Светам сустрэў Новы год. Жыхары нашага горада паступова ачухваюцца ад свята і рыхтуюцца да першага працоўнага дня. Вось і мы выйшлі з апытаннем на вуліцы. Чаго чакаюць гарадзенцы ў 2008 годзе?

Наталля, навучэнка:

Лепшага чагосьці... Каб было лепш усім на Зямлі! Для сябе – каб я добра вучылася.

Рэгіна Аляксандраўна, пенсіянерка (былы педагог):

Здароўя, дабра, каб было добра ўсім маім родным, і ўсім людзям: блізкім і тым, хто побач. Будзе здароўе – будзе настрой, будзе імкненне да ўдачы, нешта зарабіць. Не быць непатрэбным. Каб былі добрыя сябры.

Кашко Мікалай, навучэнец ХТК:

Сесію добра здаць. Чаго яшчэ чакаць?!. Кахання чакаю...

Маладая сям’я:

Андрэй (бацька): Шмат чаго: хочам развівацца, пабудавацца, шмат-шмат усяго, сына трэба расціць.

Аня (дачка): Каб хутчэй брацік падрос.

Людміла (маладая маці): Не ведаю. Усяго самага лепшага. Блізкім – здароўя, грошай пабольш, заробкаў павышэй, поспехаў, спаўнення ўсіх жаданняў.

Аляксандр, прадпрымальнік:

Ну, мабыць, павелічэння маёй вытворчасці, прыбытку пабольш, шчасця, здароўя сям’і.

Аляксандр Цімафеевіч, доктар:

Чакаю каб споўніліся маі намеры, жаданні. А таксама – маіх дзяцей, унукаў. Моцнага здароўя, поспехаў.
 
Маладая пара:

Міхаіл Саламенік: Каб споўніліся мары і планы, што не споўніліся ў 2007-м. Больш радасці, імкнуцца рабіць людзям добрае, імкнуцца рабіць шчаслівымі тых, хто побач.

Анастасія Мычко: Па-сутнасці, больш творчых поспехаў, шчасця нейкага... Зычу свабоды, у тым разуменні, у якім кожны яе бачыць. Свабоды ад фінансавых праблемаў, праблемаў у сем’ях.
 

Анатоль Аляксандравіч, пенсіянер:

Каб стабільнае жыццё было ў Беларусі.Каб не было нечаканых узлётаў цэнаў невядома адкуль. Проста павысілі ў два разы і ўсё, і нічога людзям не патлумачылі. Так не павінна быць. Калі вы павышаеце, дык кампенсуйце. Пенсіянераў загналі ў такі кут, што ледзь выжываем... Хацелася б, каб моладзь была больш актыўная, адстойвала свае правы на лепшае жыццё, а таксама і правы старэйшага пакалення, падтрымлівала яго. Хаця б гэта.

Такім чынам, з годам надышоўшым, большасць местачкоўцаў звязвае рэалізацыю сваіх бягучых патрэб і жаданняў, а нехта – высокіх мараў і памкненняў. Змена астранамічнага году пабуджае пачаць жыццё “па-новаму”, асэнсаваць здабыткі года мінулага і спланаваць намаганні на год новы.

Марат ГРЭСЬ

Андрэй БАРТАШЭВІЧ