Напрыканцы лістападу адмысловае журы падвяло вынікі фотаконкурсу “Птушка ў аб’ектыве”, які праводзіцца штогод грамадзкай арганізацыяй “Ахова птушак Бацькаўшчыны” (АПБ). Перамога гарадзенскіх фотамастакоў атрымалася амаль поўнай.

У галоўнай катэгорыі “Птушкі ў прыродзе” перамог Мікалай Гулінскі з серыяй фотаздымкаў “Зімародак”. Другое і трэцяе месцы атрымалі адпаведна працы Георгія Гулеўскага і Дзьмітрыя Якубовіча (таксама сябры АПБ з Горадні). У катэгорыі “Птушкі і краявід” перамог Георгі Гулеўскі з фотаздымкам вялікіх савукоў на зімовай нёманской вадзе, падсвечанай зыходзячым сонцам. Другое месца заняла серыя фотаздымкаў Мікалая Гулінскага. А на трэцім месцы апынуўся былы гарадзенец Аляксандар Вінчэўскі!

У катэгорыі “Арнітолагі” трыюмфавала сям’я Вінчэўскіх – таксама з Горадні. Здымак Алены Вінчэўскай “Змена падрастае” заняў першае месца, а Дзьмітры Вінчэўскі апынуўся на трэцім з працай “Супермадэлі”. Другое месца заняў здымак Вольгі Іванюцінай з Мінску.

У катэгорыях “Ахова птушак” і “Юніорскі кадр”, на якія былі дасланы літаральна адзінкавыя працы, перамаглі адпаведна Андрэй Абрамчук (Брэст) і Дзяніс Іванюцін (Мінск).

Сапраўды высокі ўзровень фотаздымкаў гарадзенскіх сябраў АПБ не пакінуў шанцаў на прызавыя месцы іншым фотамастакам, а на праведзеным пад час з’езду АПБ галасаванні ўдзельнікаў гэтага форуму з усёй Беларусі перамога была нават ўмацавана. Перамог здымак “Поплаўны лунь” гарадзенца Георгія Гулеўскага атрымаўшы найбольш галасоў. У выніку – прызам глядацкіх сымпатый. Дарэчы, менавіта гэты здымак упрыгожвае вокладку чарговага нумару сяброўскага часопіса АПБ “Птушкі і мы”.

Дзьмітры ВІНЧЭЎСКІ

На здымку Віктара Гулінскага: пераможца фотаконкурсу Мікалай Гулінскі падчас фотапалявання.

Здымак Міхаіла Гулінскага “Вясна на падыходзе”.