Вячаслаў Сівакоў, заслужаны трэнер РБ па футболе: Я станоўча стаўлюся да рэканструкцыі. Хоць я далёкі ад гэтых пытанняў, але мне падабаюцца новыя фасады, тратуары. Вельмі папрыгажэла вуліца Горкага! Там раней былі драўляныя дамы. Драўляныя дамы ў наш час?! Тыя будынкі, якія немагчыма захаваць, можна знесці, а на іх месцы зрабіць нешта падобнае.

Пагаджуся, што неабходна шукаць альтэрнатыўнае рашэнне праблеме транспартных “пробак” на Савецкай плошчы.

Сяргей Няфёдаў, майстар спорта па футболе, былы трэнер каманды “Нёман” (Гродна): Усё маё юнацтва прайшло на перакрыжаванні вуліц Горкага і 17 верасня, дзе я пражыў 10 гадоў. З аднаго боку, гэтыя старыя будынкі – каштоўныя помнікі архітэктуры. З другога боку, сённяшнія будоўлі азначаюць, што горад расце. Мне цяжка сказаць штосьці адназчнае ў дадзеным выпадку.

Арцём Малтабараў, генеральны сакратар лігі спартыўных баявых мастацтваў “Яднанне”: Калі старым будынкам пакінуць першасны знешні выгляд, а функцыянальнае прызначэнне надаць новае, - такая сітуацыя цалкам нармальная. А калі з музея робяць які-небудзь паркінг, то гэта проста непрымальна.

Патэнцыял грамадскіх ініцыятыў у дадзеным выпадку даволі адносны. Намаганні асобных людзей наўрадці будуць моцнымі. А вось аб´яднанне, што мае пячатку і юрыдычны адрас, - гэта ўжо штосьці.

Аляксей Пынцікаў, баскетбаліст зборнай Беларусі:  Цяжка пра нешта казаць, калі знаходзішся далёка ад месца падзеяў. А калі прыязджаеш у Гродна, то шкада бачыць шэрую плітку замест дрэваў каля танка на Савецкай.

Акрамя прафесійных спартсменаў мы звярнуліся да хлопцаў, якія штодзень ганяюць на скейтах на Савецкай плошчы.

-          Якой вы б хацелі бачыць Савецкую плошчу: такой, як зараз, з шэрай пліткай, ці ўзноўленую паводле старых узораў?

-          Лепш так, як зараз, бо так больш сучасна!

-          Так катацца можна.

-          А калі  зрабіць такую ж вялікую пляцоўку, дзе б было зручна ганяць на скейце, не ў цэнтры, а, напрыклад, на Фартах ці ў Вішняўцы?

-          Калі пабудуюць, мы толькі “За!”

Падрыхтавала

Хрысціна Марчук.