Асаблівасць прыёмнай кампаніі гэтага года: увядзенне прафесійна-псіхалагічнай суразмовы, якая адыгрывае вельмі важную ролю і  як бы з’яўляецца дазволам на ўдзел у конкурс па выбранай абітурыентам спецыяльнасці.

Пытанні ў камісіі да абітурыентаў былі розныя: каму пашчасціла, той распісаў пра фарбы свайго жыцця і вучобы і атрымаў цудоўную паперку. Калі не – расказвалі пра сацыяльна-эканамічны, палітычны стан як Беларусі, так і іншых краін, пра беларускіх партнёраў у вобласці прамысловасці і сельскай гаспадаркі.

Адна «дарослая» журналістка расказала мне, што калісьці нешта падобнае праводзілася ў БДУ (у мінулым стагоддзі) на факультэце журналістыкі. Гэта было абаснавана вялікім конкурсам – каля 20-ці чалавек на месца, і выглядала вельмі лагічна:  дазволам на ўдзел у конкурсе з’яўлялася напісанне сачынення на вольную тэму, дзе пры праверцы не ўлічваліся арфаграфічныя памылкі, а разглядаліся стыль напісання, здольнасць раскрыць тэму. Хто праходзіў гэта выпрабаванне, удзельнічаў яшчэ ў шэрагу этапаў, адным з каторых з’яўлялася і напісанне «рэпартажу»: абітурыентам даваўся пэўны час, яны хадзілі па вуліцах Мінска, што ўбачылі – тое і напісалі і г.д.  Так званы «творчы конкурс» і выявіў тых, хто насамрэч марыць аб журналістыцы і нечага варты. А потым ужо тыя, хто вытрымаў спабор, здаваў «нармальныя» экзамены. Гэта было цяжка для абітурыентаў, можа таму і адмовіліся ў наступныя гады ад такіх эксперыментаў… Але, паўтаруся – у гэтым была логіка.

А з якой мэтай зараз увялі суразмову, застаецца толькі разважаць...

Наталія ВАЖЭЙКА