Гарадзенскі анімэ-клуб «Геншыкен» ладзіў Фан-арт для аматараў японскага мастацтва… Памяшканне «Камелота» з яго сярэднявечным антуражам стала ўдалым месцам правядзення гэтага мерапрыемства. Імпрэза складалася з конкурсу лепшых малюнкаў у стыле анімэ, касцюміраванай прэзентацыі і танцу гейш. Фан-арт сабраў не толькі сябраў «Геншыкен», але і многіх іншых аматараў анімэ-мастацтва. Гэта мерапрыемства стала своеасаблівай рэпетыцыяй перад усебеларускім злётам прыхільнікаў папулярнай субкультуры, які адбудзецца ў маі. Месцам правядзення плануецца зрабіць турбазу «Купалінка».

Няцяжка здагадацца, што назва руху анімэ з’яўляецца скарочаным варыянтам слова «анімацыя». Так у Японіі называюць любыя аніміраваныя фільмы. У сусветнай культуры паняцце «анімэ» прынята звязваць менавіта з японскай мультыплікацыяй. Жанр анімэ бярэ пачатак у 60-я гады мінулага стагоддзя, калі Японія на фоне свайго эканамічнага цуда стала адкрытай для сусветнай супольнасці, а японскія аніматары, напэўна,  пазнаёміліся з творамі студыі У.Дзіснэя. Выразныя вочы, якія займаюць ледзьве не палову твару мульцяшкі– прыклад уздзеяння дзіснэеўскай традыцыі. Уплыў амерыканскай мультыплікацыі яскрава назіраўся ў ленце «Астрабой», якая стала адной з першых анімэ твораў.

Паступова японская мультыплікацыя набывала толькі яму ўласцівыя рысы. Дзякуючы  ўнікальнаму стылю малюнкаў, творы мастацтва анімэ валодаюць незвычайнай эмацыянальнай афарбоўкай. З часу з’яўлення рускамоўных версій гэтыя творы знаходзяць сваіх прыхільнікаў у Беларусі, Расіі, Украіне і многіх іншых постсавецкіх краінах.

Незвычайнай папулярнасцю сярод гарадзенцаў анімэ карыстаецца ужо на працягу некалькіх год. Пачыналася ўсё з аднаго вельмі ініцыятыўнага маладога чалавека, які арганізаваў клуб па інтарэсах. Ідэя абрастала магчымасцямі і справамі. У выніку,у лістападзе 2006 года было зарэгістравана аматарскае аб’яднанне «Геншыкен». Пакуль гэта адзіны ў Беларусі афіцыйна зарэгістраваны клуб анімэшнікаў са сваёй арганізацыйнай структурай і нават прэзідэнтам.

На сённяшні дзень клуб мае 35 сяброў, але колькасць іх расце, так як аматараў анімэ сярод гарадзенцаў становіцца ўсё больш. Маецца секцыя японскай мовы, фан-арту (маляванне мангі), секцыя кансолей і інш. Гродзенскія анімэшнікі прымаюць ўдзел у штогадовых анімэ-фэстывалях, сярод іх шырока вядомай з’яўляецца Хіган – унікальная выстава, якая чарговы раз будзе праводзіцца восенню ў Мінску. Тры разы ў тыдзень сябры «Геншыкен» збіраюцца, каб распланаваць сваю дзейнасць і падзяліцца ўраджаннямі ад той ці іншай навінкі ў свеце анімэ.

Удзельнікі конкурсу фан-арта ў нядзелю маглі не толькі выявіць лепшага аўтара малюнка ў анімэ-стылі, але і атрымаць асалоду ад DDR (Dance Dance Revolution) – папулярнага сярод анімэшнікаў усяго свету музычна-танцавальнага апарату. Сярод забаў былі кансольныя гульні і карты. Калі раптам нехта ўбачыць гэтыя карты упершыню, то, напэўна, здзіўленню не будзе межаў. Замест звыклых трэфаў і бубнаў на картах выявы дзіўных істот і нейкія містычныя надпісы. Любы анімэшнік з радасцю растлумачыць, што гэта калекцыйная картачная гульня «Yu-Gi-Oh!». Сэнс яе такі ж, як у вельмі наварочаных шахмат. Нечым яна нагадвае сюжэт папулярнай кампутарнай гульні «Heroes III». Танец гейш стаў кульмінацыяй імпрэзы і яе ізюмінкай. Асабліва ўражваюць касцюмы. Чорныя з блескам кімано самураяў і яркія сарі – касцюмы японскіх гейш – усе гэтыя касцюмы створаны рукамі Тані-Chezet і Ілоны-Кананю, сябровак клуба, якім дапамагае Святлана, маці Тані. Сапраўды моднае сямейнае хоббі! Дарэчы, на тое, каб папрасаваць адзін касцюм, дзяўчыны патрацілі больш гадзіны.   

Гледзячы на натхненне, з якім анімэшнікі ствараюць новыя вобразы і цікавяцца мастацтвам анімэ, разумееш, якую асалоду можа прыносіць справа, шчырым аматарам якой ты з’яўляешся. Такіх шчырых аматараў, напэўна, і сабраў клуб «Геншыкен».

Jison-Яўген, прэзідэнт клуба  «Геншыкен»:

– Трошкі шкада, што абывацелі блытаюць анімэ з «пакемонамі». Мы дзейнічаем, каб упэўніць, што падобнае параўнанне няправільнае і што анімэ – гэта цудоўнае і ўнікальнае мастацтва. Я вельмі рады, што анімэ знаходзіць усё больш прыхільнікаў сярод нас. Гэта карыснае захапленне. Гэта здаровая альтэрнатыва заганам, кшталту алкаголю і наркотыкаў.

Павел-ODD, удзельнік конкурсу, сябра клуба:

– Гэты конкурс дазваляе паказаць свой творчы мастацкі талент, пазнаёміцца з людзьмі, з якімі маеш агульныя інтарэсы, людзьмі, якія любяць маляваць і любяць анімэ.

Сакусенсава-сенсей-Павел, сябра клуба, член аргкамітэту:

– Наша мерапрыемства мела вялікі поспех. Была насычаная праграма. Усім было цікава і весела. Праўда, магло быць больш людзей. Але наша аб’яднанне не камерцыйнае, і піяр мы праводзім толькі ўласнымі сіламі і за ўласныя сродкі, таму многія людзі проста не ведалі пра гэты конкурс. Гэта можна нам дараваць – мерапрыемства такога плану праводзілася намі ўпершыню. У далейшым мы плануем пашырыць нашу праграму, зрабіць яе больш яркай і насычанай, запрасіць гасцей з усёй Беларусі.

Міхал СКАЎЦКІ,
фота аўтара