Шэраг беларускіх выданняў ужо пісалі-перапісалі навіну аб тым, што ў Гародні плануецца адкрыццё групаў у дзіцячых садках з беларускай мовай навучання і выхавання. Пасля гучала навіна аб тым, што адпаведная рэклама з’явіцца на гарадскіх рынках і ў транспарце. І гэта сапраўды была ў сваім  родзе сенсацыя...  

Мяне адразу зацікавіла, а ці не плануюцца такія групы ў нас... у Слоніме. Кіраўнік аддзела агульнай сярэдняй і дашкольнай адукацыі ўпраўлення адукацыі Слонімскага райвыканкама Галіна Матвеева адразу не была гатова адказаць на пытанне і папрасіла мяне патэлефанаваць крыху пазней. Зазвычай, пасля такой просьбы чыноўніка, да яго вельмі цяжка дазваніцца. Але я быў ўражаны тым, што праз паўгадзіны жанчына мяне чакала. “У нас не плануецца стварэнне ў садках беларускамоўных груп, — ганарліва прамовіла Галіна Васільеўна. — Не плануецца, бо ў гэтым пакуль няма неабходнасці. Таму што ў 16-м садзе ўжо ёсць такая група, а трэці садок цалкам беларускамоўны”.

“Вось гэта навіна! Няўжо праўда?” — думаў я. Але кіраўніцтва трэцяга садка наадрэз адказалася са мной размаўляць, спасылаючыся на то, што ім забаронена кантактаваць з незалежнай прэсай. Праз пэўны час мне ператэлефанавалі і паведамілі, што сапраўды, дзіцячы этнасад №3 ужо амаль пяць гадоў працуе з беларускай мовай навучання і выхавання. Але, на жаль, на прапанову падрабязней напісаць пра садок, мне адмовілі... Як паказала апытанне, мала хто ведае, што ў Слоніме ёсць такі садок. А мажліва, хто-небудзь з бацькоў з радасцю аддаў бы туды на выхаванне сваё дзіця.

Сяржук МАЛАНКА