У апошні перыяд у дзяржаўных медыя не адбылося істотных зрухаў датычна асвятлення выбарчага працэсу і яго суб’ектаў. Галоўнымі фігурантамі па-ранейшаму заставаліся Прэзідэнт, ЦВК і выбарчыя камісіі ніжэйшага ўзроўню…

Інтэрнет-рэсурсы www.belta.by, www.naviny.by, www.tut.by захавалі прыкладна тую ж, што і ў папярэдні перыяд, увагу да парламенцкіх выбараў. Аднак параўнальна з дзяржаўным інтэрнет-выданнем БЕЛТА, дзе асноўная плошча (колькасць знакаў) адводзілася толькі двум суб’ектам (Прэзідэнту і ЦВК – амаль 87%), вышэйзгаданыя інтэрнет-рэсурсы больш увагі пачалі надаваць іншым суб’ектам выбарчага працэсу. Так, www.naviny.by  ЦВК і Прэзідэнту адвялі 37% плошчы (знакаў), а іншым суб’ектам – 63%.  Інтэрнет-рэсурс www.tut.by  -  адпаведна 46% і 44% віртуальнай плошчы.

Заўважна шырэйшая на недзяржаўных сайтах і прысутнасць суб’ектаў выбарчага працэсу. Гэтак,  www.tut.by асвятлялі дзейнасць (ці ўзгадвалі) 25 суб’ектаў, www.naviny.by – 24, а сайт БЕЛТА – 17.

Яшчэ менш увагі суб’ектам выбарчага працэсу, акрамя Прэзідэнта і ЦВК, надала дзяржаўная прэса. Гэтак, у «Советской Белоруссии» фігуравалі ў гэты перыяд толькі 6 суб’ектаў, прычым Прэзідэнту і ЦВК газета адвяла 90% плошчы, а 4 астатнім – 10%. «Гомельская праўда» прысвяціла заходнім назіральнікам і назіральнікам ад СНД  0,18% плошчы, а Прэзідэнту і выбарчым камісіям – астатнія 99,82%.

Гэткім чынам, відавочна, што дзяржаўныя медыя працягваюць асвятляць выбарчы працэс паводле надзвычай спрошчанай схемы, г.зн., не надаючы ніякай ўвагі іншым (акрамя ЦВК і Прэзідэнта) суб’ектам. Прапануючы такую схему, яны тым самым не інфармуюць выбаршчыкаў пра іншых (як рэальных, так і патэнцыйных) суб’ектаў выбарчага працэсу і іх дзейнасць.

Параўнальна з дзяржаўнай прэсай, недзяржаўныя газеты репрэзентавалі значна шырэйшае кола ўдзельнікаў выбарчага працэсу. Гэтак, «Народная воля» згадвала дзейнасць 17 суб’ектаў выбарчага працэсу,  а «Белорусы и рынок» – 15.

Што тычыцца манеры рэпрэзентацыі суб’ектаў выбарчага працэсу і іх дзейнасці, то некаторыя дзяржаўныя медыя, хоць і без ранейшага імпэту, аднак працягвалі характарызаваць апанентаў улады ў негатыўным святле. Напрыклад, матэрыялы Дз. Крята і Н. Правалінскай у “СБ” (12.08.08), дзе ў псеўдавясковым скандальным стылі смакуюцца канфлікты ў апазіцыйных структурах.

Акрамя таго, што недзяржаўныя выданні падалі больш поўную карціну выбарчага працэсу, яны і больш збалансавана паставіліся да яго ўдзельнікаў. Перадусім гэта тычыцца газеты «Белорусы и рынок». 

«Народная воля», хаця і выявіла негатыўнае стаўленне да сённяшняй улады, аднак нейтральна пісала пра іншых удзельнікаў выбарчага працэсу, у тым ліку пра апазіцыю і назіральнікаў ад СНД.  «Брестский кур’ер», асвятляючы выбарчы працэс і яго ўдзельнікаў, трымаўся цалкам нейтральнай пазіцыі.

ГА «Беларуская асацыяцыя журналістаў»