Перш за ўсё я вырашыла даведацца, як дакладна “Вельвет” ажыццяўляе арганізацыю і правядзенне выпускных. Вось як гэта адбываецца. Існуе група ініцыятыўных маладых людзей -“мазгавы штурм”, які рыхтуе і прапаноўвае некалькі варыянтаў сцэнараў. Кожны выпускнік сам вырашае, ці будзе ён прымаць у гэтым удзел. Тыя, каму гэта цікава, выбіраюць сцэнар, які ім найбольш спадабаўся, і па жаданню ўносяць свае карэктывы. Свята можа праводзіцца ў выглядзе моднай вечарыны, сапраўднага балю, вечарыны ў стылі рэтра і г.д. Пры гэтым выкарыстоўваецца адпаведнае аздабленне памяшкання, падбіраецца музыка. Можна замовіць выступленне зоркі эстрады, арабскі танец, моднага дыск-жакея і многае іншае. Як гаворыцца:”Любы капрыз за вашыя грошы”. У прайс-лісце адзначаны такі пункт, як арыгінальнае віншаванне бацькамі сваіх дзяцей. Мне растлумачылі, што пры гэтым да кожнага выкарыстоўваецца індывідуальны падыход. Як прыклад можна ўспомніць выпадак, калі трое бацькоў у якасці падарунка для сыноў замовілі танец, і не якога-небудзь народнага ансамбля, а сапраўдны … стрыптыз. Пры гэтым яны прапанавалі заплаціць суму ў трайным памеры, каб толькі захаваць у сакрэце ад жонак, што гэтая ідэя належала менавіта ім. Акрамя таго прапаноўваліся такія віды паслуг, як святочны феерверк, арганізацыя ўрачыстай сустрэчы світанка, транспартныя паслугі і многае іншае. Зразумела, кожная з гэтых паслуг каштуе па-рознаму, і некаторыя з іх далёка не танныя. Але не абавязкова замаўляць увесь комплекс. Гэта асабістая справа кожнага.
Паразмаўляўшы з супрацоўнікам “Вельвета”, я звярнулася да людзей больш сталага ўзросту з просьбай расказаць пра іх выпускны вечар. Што цікава, амаль усім найбольш запомніліся танцы і ўласнае ўбранне, а забаўляльнай праграмы амаль не было. Пытаюся: ”А  як вы ставіцеся да існавання спецыяльных фірмаў, якія займаюцца арганізацыяй святаў, у тым ліку выпускных вечароў?” Усе выказваліся даволі станоўча: ”Калі людзей задавальняюць умовы і прапановы, то чаму не даверыцца прафесіяналам.”
Урэшце ў розных краінах ужо даўно існуюць фірмы такога тыпу. Наша краіна - не выключэнне. Тыя, хто жадаюць весела і крэатыўна адзначыць важныя падзеі  свайго жыцця, але не маюць фантазіі і часу займацца арганізацыйнымі пытаннямі, актыўна карыстаюцца паслугамі гэтых фірмаў і застаюцца задаволенымі.

Света Каскевіч