Першыя дзьве кропкі безправаднога доступу ў інтэрнэт, якія працуюць па тэхналогіі Wi-Fi, з’явіліся ў Гродне. З іх дапамогай можна выходзіць у Сетку, выкарыстоўваючы ноўтбук, КПК альбо некаторыя мадэлі мабільных тэлефонаў.

Кропкі доступу ўсталяваныя ў будынку чыгуначнага вакзалу і ў Сэрвісным цэнтры “Белтэлекаму” па вул. Тэлеграфнай. У час тэставання паслуга прадстаўляецца бясплатна з адзіным абмежаваннем – адначасова могуць працаваць не больш 20 карыстальнікаў. Заяўленая хуткасць падключэння да інтэрнэту – да 1 Мт/с з абмежаваннем на запампоўванне вялікіх файлаў. У будучым доступ да інтэрнэту будзе ажыццяўляцца па картках – чакаецца, што кошт трафіка праз Wi-Fi-доступ будзе прыблізна такі самы, як кошт трафіку праз Byfly.

У Еўропе бясплатныя паслугі доступу ў Сетку прадстаўляюць у шамтлікіх кавярнях, будынках вакзалаў і аэрапортаў «у нагрузку» дзеля таго, каб разнастаіць чаканне альбо прадставіць дадатковыя паслугі. Уладальнікі рэстаранаў даўно зразумелі – кліент, які “завіс” з ноўтбукам за столікам кавярні, павялічвае кошт сярэдняга чэку – праз пункт доступу ён не толькі выходзіць у Сетку, але і заказвае стравы “па інтэрнэце” альбо правярае расклад вылетаў самалётаў. Каля 90% хотспотаў з больш чым 300 000 па ўсім свеце – бясплатныя.

Беларускае заканадаўства пакуль недасканалае ў справе рэгламантавання разгортвання безправадных сетак. Стварэнне публічных сетак на безліцэнзійнай падставе ў паласе частотаў 2400 - 2483,5 МГц было афіцыйна прыпынена 31 студзеня 2006 г. Дзяржаўнай Камісіяй па радыёчастотах. Такім чынам, фірмы, якія хацелі б стварыць пункт доступу, павінны заключаць з Белтэлекамам дамову на ўсталяванне абсталявання і прадстаўленне паслугаў выхаду ў Сетку. Гэта выклікае імклівы рост коштаў ўвахода – для падключэння неабходны разнастайныя экспертызы агульным коштам каля мільёна рублёў і дзевяць дазволаў з розных інстанцый.

Усталяванне пункту доступу, абслугоўванне абсталявання, стварэнне сеткі продажу картак (а іх кошт павінен быць такім, каб мець магчымасць канкурэнцыі з мабільнымі аператарамі, якія прадстаўляюць паслугу выхаду ў Сетку па коштах ад 3000 рублёў у суткі) – усё гэта выліваецца ў буйныя сумы. Таму малаверагодна, што праект можа акупіцца за кошт карыстальнікаў. У гэты момант варта гаварыць пра Wi-Fi-сеткі як іміджавы праект Белтэлекама.

Юры ЗАЯЦ