Падарожжа

Край неразбураных палацаў

22 студзеня 2010 | Піша Сяргей Кузняцоў

Аўтамабільны шлях, што вядзе з беларускіх Брузгоў у паўднёвыя краіны Еўрапейскага Саюзу,– гэта польская траса пад нумарам 19. У Беластоку яна заварочвае ў паўднёвым кірунку і бяжыць уздоўж беларускай і ўкраінскай межаў. За 26 кіламетраў да Любліна «дзевятнаццатка» праходзіць праз Любартаў. Акурат у гэтыя мясціны я хачу запрасіць гэтым разам чытачоў «Твайго Стылю».

Затрымацца ў Любартове варта каля палаца.

Палацавы комплекс – спадчына слыннага роду Сангушкаў. На жаль, у 1933 тут адбыўся пажар і палац моцна пацярпеў. Цяпер тут знаходзіцца сядзіба павятовага староства (іншымі словамі, райвыканкам).

Парк пры палацы на першы выгляд падаецца дзікім,

але ў гэтай дзікасці прыхавана сваё хараство.

Флігелі палацу, на жаль, у руінах…

Справа ад палаца стаіць барокавы касцёл Св. Ганны.

У 2008 ён атрымаў статус базілікі меншай.

За 9 км ад Любартава знаходзіцца вёсачка Казлоўка, вядомая на ўсю Польшчу сваім палацам, колішняй рэзідэнцыяй роду Замойскіх. Цяпер тут музей.

Мясцовы парк – асобны твор мастацтва.

Адзін з цікавых помнікаў у парку– магіла загінулым напалеонаўскім салдатам вайны 1812 года. Тады многія, як у Польшчы, так і ў Вялікім княстве бачылі ў Напалеоне вызваліцеля.

Паўліны пачуваюцца гаспадарамі не толькі ў парку, але і на балюстрадах палаца.

Не гледзячы на даволі высокі кошт музейнага квітка варта наведаць пакоі палацу, каб адчуць веліч арыстакратычнага дома. На здымках – спальня і бібліятэка з гульнёй, падобнай на більярд, але без лузаў.

Частка палаца – касцёл з унікальнымі вітражамі.

Прагулкі па Казлоўцы і палацу зачароўваюць. Большасць рэчаў тут аўтэнтычныя.

Пасля 1944 тут не зрабілі тут санаторый, як у Нясвіжы, ці свінакомплекс, як у Гальшанах. Тут захавалася гісторыя, дакрануцца да якой едуць турысты з усёй Польшчы.

Фотаздымкі: Вольга Беднякова, Ларыса Калеснік, Сяргей Кузняцоў, Аксана Літвак

Здымкі інтэр’ераў: Музей Замойскіх у Казлоўцы