Навіны

Хутка стартуе Міжнародны Восеньскі Фестываль клубаў ЮНЭСКА

15 каcтрычнiка 2010 | Піша Воля Гарадзенская

З 5 па 7 лістапада ў Гродна на базе гарадзенскага універсітэту імя Янкі Купалы пройдзе XI Міжнародны Фестываль клубаў ЮНЭСКА "Унікальная мова зносін моладзі".

Кіраўніцтва, арганізацыю і правядзенне Фестывалю ажыццяўляе Гарадзенскае аддзяленне "Беларускай Асацыяцыі клубаў ЮНЭСКА" пры падтрымцы Гарадзенскага гарадскога і абласнога выканкамаў.

У рамках мерапрыемства пройдуць адукацыйныя семінары, прэс-канферэнцыя, будзе наладжана праца 5 адукацыйных секцый, арганізавана ролевая гульня. Акрамя гэтага, у першы дзень Фестывалю пройдзе флэш-моб па тэме мерапрыемства, а на другі дзень адбудзецца рок-канцэрт.

Тэма Фестывалю вызначаецца зарання згодна з тымі актуальнымі пытаннямі, якія ўзнікаюць на дадзены момант у грамадстве.

Як паведаміў галоўны каардынатар Фэсту Юрый Груца, галоўная мэта Фестывалю - азнаёміць моладзь з працай ЮНЭСКА, адукаваць сябраў клубаў ЮНЭСКА у той ці іншай сферы, напрыклад, у напісанні праектаў, развіць у іх лідэрскія якасці, ініцыятыўнасць.

"Фестываль - гэта своеасаблівы штуршок да дзеянняў, да згуртавання моладзі, - адзначыў сп. Груца - Мы ставім перад сабой вельмі важныя сацыяльныя задачы. Мы хочам аб'яднаць моладзь і зрабіць іх працу ў клубах больш эфектыўнай. Таксама гэта цудоўная магчымасць для абмену вопытам у дзеянні моладзевых арганізацый і ініцыятыў."

На здымку: удзельнікі Вясновага Фестывалю Клубаў ЮНЭСКА, 2009 г.

Фота: http://www.un.by/unesco-grodno