Навіны

У Гродне прэзентавалі "Постаці" (відэа, фота)

29 каcтрычнiка 2010 | Піша В.Дрэма

Цёплыя словы і песні, малыя дзеткі і сівыя гарадзенцы, перапоўненая зала абласной бібліятэкі - у такой абстаноўцы ўчора ў Гродне адбылася прэзентацыя дыску "Постаці", які складаецца з відэаінтэрв'ю з людзьмі, якія зрабілі вялікі ўнёсак у захаванне і папулярызацыю беларускай культуры.

Удзельнікаў прэзентацыі вітаў дзіцячы ансамбль з садка №31.

Затым гасцям быў прадстаўлены кароткі фільм, які распавядаў пра тое, як здзяйснялася падрыхтоўка дыска ды ўтрымліваў урыўкі інтэрв'ю некаторых з герояў.

Упрыгожаннем вечарына сталі выступы гарадзенцаў-герояў "Постацяў" - майстра саломапляцення Яўгена Блудава, кампазітара Яўгена Петрашэвіча (на здымку), мастака Зміцера Іваноўскага, кіраўніцы хора беларускай духоўнай музыкі "Бацькаўшчына" Веры Кунцэвіч (на здымку), кіраўніка грамадскага аб'яднання "Паходня" Міколы Таранды.

Скончылася вечарына калектыўным выкананнем гімна "Магутны Божа".

Дыск "Постаці" быў створаны пры падтрымцы грамадскага аб'яднання "Цэнтр "Трэці сектар" групай моладзі, сярод якой былі і аўтары "Твайго стылю" - Інга Сакута (кіраўніца праекта), Юлія Каляда, Юлія Катаржынская, Воля Корсун, Юры Седзянеўскі.