Увесну прынята актыўна займацца спортам. Хтосьці дужаеццца з лішняй вагай і прыводзіць сябе ў форму пасля зімы, а для кагосьці спорт – гэта абавязковая і неад’емная частка жыцця, прычым ня толькі вясной, але і ўвесь год. Хтосьці з цяжкасцю вытрымлівае ўрокі фізкультуры і пешую дарогу да крамы, а хтосьці праводзіць увесь вольны час у спортзале ці ў басейне.  Ці любяць жыхары Гродна спорт так, як яны любяць Інтэрнэт, вырашылі высвятліць мы ў апытанні: Якое месца ў вашым жыцці займае спорт?».

 Сяргей: Займаюся спортам выключна для сябе. Калі ёсць магчымасць, наведваюся ў спартзалу.

 
Леанід: Спорт у маім жыцці займае вельмі значнае месца, асабліва плаванне. Абавязкова хаджу ў басейн.

Павел: Люблю баскетбол, а часам хаджу ў басейн з сябрам. Два разы на тыдзень – стабільна. Увогуле, займаемся спортам яшчэ з шостага класа і не ўяўляем жыцце без яго.

 
Анатоль Аляксандравіч (адмовіўся ад фота): Нармалёвае месца займае! У лазню люблю хадзіці, да!

Надзея Іосіфаўна (адмовілася ад фота): Спорт у маім жыцці? Да ніякага месца не займае (смяецца).

Хлопец з Вілейкі: Вельмі люблю спорт. Ужо чатыры з паловай гады займаюся турызмам. Хаджу ў горы, мінулым летам быў у Карпатах. Уладкоўваем экспедыцыі і паходы, плаваем на байдарках. А яшчэ люблю на лыжах катацца. Я вам так скажу – лепей спортам займацца, чым гарэлка альбо піва піць! Гэта сапраўды!

 
Маргарыта: Досыць значнае, але яго выцясняюць вучоба і сям’я. Раней займалася тэнісам. Зараз пры магчымасці хаджу ў басейн, але не заўсёды хапае часу.

Юрый (студэнт Каледжа мастацтваў): Вялікае. І гэтаму спрыяюць урокі фізкультуры ў Каледжы мастацтваў. Наша настаўніца – вялікая фанатка спорту, і прышчапляе нам каханне да спорту. А яшчэ я хаджу ў басейн, таму што ў меня там маці працуе.

Зміцер: Вялікае. Хаджу ў басейн, займаюся танцамі – бальнымі, народнымі і класічнымі.

 
Наталля і Аляксандр: – Другараднае, мабыць. З-за катастрафічнага недахопу часу зараз спортам практычна не займаемся, але вельмі жадалі б.
–  У юнацкасці шмат займаліся спортам, былыя гімнасты. Дзякуючы гэтаму я зараз сябе вельмі добра адчуваю і добра захаваўся.  

 
Саша і Наташа: Часта ходзім у басейн, вельмі падабаецца плаваць.

 
І напрыканцы – маленькая заўвага: падчас праведзення апытання, мы не знайшлі жыхароў, якім ніколечкі не патрэбен спорт. І, шчыра кажучы, мяне, чамусьці, адолела жаданне схадзіць у басейн. Праўда, баюся, чарга там будзе прыстойная – судзячы па адказах, не толькі я люблю плаванне. Але ж гэта файна. ТС – за здаровы лад жыцця, бо гэта стыльна!

Дар’я КУЛІНКА,

фота Алінкі НОВІК