Выстава японскай керамікі адкрылася ў гродзенскім Новым замку. Наведвальнікам прапанаваны творы 28 японскіх мастакоў-авангардыстаў, якія працавалі ў другой палове мінулага стагоддзя. Калекцыя была прадастаўлена Гродзенскаму гісторыка-археалагічнаму музею Японскім фондам, які займаецца арганізацыяй экспазіцый японскага мастацтва за мяжой.

Гэта ўжо другое па ліку падобнае мерапрыемства ў Гродна. Па словах адміністратара выставачнай залы, за тыдзень працы выставу наведалі каля сотні чалавек. Запісы ў журнале водгукаў сведчаць пра вялікую цікаўнасць гродзенцаў да сучаснага і традыцыйнага мастацтва Японіі.

Авангардны накірунак японскай керамікі ўключае неардынарны падыход у рабоце з традыцыйным матэрыялам. Стылістыка пастіндустрыяльнай эпохі стварае глебу для шматмернага разумення ідэі аўтараў. Многія наведвальнікі адзначаюць, што прадстаўленыя кампазіцыі прымушаюць задумацца. Асаблівую цікавасць выклікалі “Упакоўка – 82 В” мастака Мішымы Кіміё і “Біблія на пяску” Аракі Такако. Не менш экспрэсіўныя ўражанні пасля знаёмства з чатырма тэматычнымі групамі твораў: геаметрычныя фігуры, прадметныя аб’екты, пасудныя формы, арганічныя кампазіцыі.

Аснову выставы ствараюць творы прадстаўнікоў майстроў са школы “Sodeіsha”, якія працягнулі традыцыі мастацтва керамікі Кіёта. Галоўная іх ідэя ў стварэнні з гліны не толькі прадметаў для практычнага выкарыстання, але і твораў з высокім духоўным напаўненнем. “Новае мастацтва” японскіх майстроў стварае плоскасць паміж рэальным і фантастычным. Выставу можна будзе наведаць на працягу снежня.

Міхал СКАЎЦКІ