Сумясціць раўналежныя кінасусветы – ідэя не новая і, як правіла, чыста камерцыйная. Разлік просты да геніяльнасці: прыхільнікі «аднаго» разам з прыхільнікамі «іншага» купяць больш квіткоў, чым проста прыхільнікі «аднаго».

Упершыню на кінаэкранах «Чужыя» сустрэліся з «Драпежнікам" у 2004 г. з лёгкай рэжысёрскай рукі Пола Андэрсана. Чаканні стваральнікаў праекту спраўдзіліся: яны сабралі прыстойную касу, дзякуючы фанатам, якія жадалі бачыць сваіх харызматычных і жудасных улюбёнцаў! Аднак параўнанне фільма з яго атмасфернымі і магутнымі прабацькамі, якія выйшлі ў канцы мінулага стагоддзя, расчаравала гледача. Але прыгожыя постэры і відовішчныя трэйлеры ўжо клічуць на «Чужыя супраць Драпежніка: Рэквіем»… Нацкоўваць гэтых персанажаў узяліся Грэгары Страўс і Колін Страўс за сціплыя на сённяшні дзень 40 мільёнаў. Пацешыла музыка Браяна Тайлера, засмуцілі акцёры… Судзячы па ўсім, большая частка бюджэту сышла на спецэфекты. Іх ў карціне хапае, а вось выразнага сюжэту я не ўбачыў. Толькі монстраў, якія бегаюць–скачуць, дзяруць і кідаюць, нападаюць, кусаюць, дзяруцца… Людзі, здаецца, патрэбныя былі толькі для таго, каб паміраць пачкамі. Але братам Страўсам наштосьці спатрэбілася паказаць нам клішаваных герояў–чалавечкаў, якія не выклікаюць ніякага суперажывання. Затое, яго можа выклікаць Драпежнік. Ён і ёсць герой! Узброены і смяротны, ён адзін спраўляецца з незлічонымі Чужымі. У фінале, праўда, і яму прыходзіцца прутка, і аўтары намякаюць на трэцюю частку.

Калі ставіцца да праекту як да самастойнай з'явы і не настальгаваць па шэдэўрах Камерона і Скота, ад якіх мурашкі беглі па скуры, а ўвага прыкоўвалася да экрана ад пачатку і да канца, то можна, пакорліва ўздыхнуўшы, прызнаць, што фільм 2007 г. атрымаўся, хоць і не страшным, але месцамі забаўляльным і ў цэлым здатны да прагляду…  

Назва: Чужыя супраць Драпежніка: Рэквіем / Aliens vs. Predator Requiem

Краіна: ЗША, Канада

Вердыкт: не чакайце занадта шмат, бо карціна не рэалізавала свайго патэнцыялу.

Марат ГРЭСЬ