2007 год адзначыўся шэрагам трыквелаў: каранацыя Шрэка ІІІ, новыя сябры Оўшэна, працяг Чалавека–павука. Але хіба што заслужаным лідэрам у гэтым спісе былі Піраты Карыбскага мора 3: На краі Свету.

Нагадаем, што першая частка, знятая па матывах атракцыёну, аказалася нечакана паспяховай, так што на сіквэл прадзюсеры адшкадавалі значна большыя грошы. Гэта, а таксама прадуманае спалучэнне не найгорш распрацаванага сюжэта з удалымі складнікамі папярэдняга фільму, дазволіла “Куфару мерцвяка” пераплюнуць, мабыць, усе вядомыя кінастужкі пра піратаў. Бліскучы гумар, ліхія паядынкі і пагоні, непараўнальны Дэп, эпічная музыка Зімера ды іншыя знаходкі праекта прынеслі мільярдную касу яго стваральнікам. Несумненна выйгрышным было трапнае запрашэнне гледачоў на працяг у фінале з Джэфры Рашам.

Чаго чакалі гледачы? Улічваючы прагрэсію “Куфару”, драйв ды гумар меліся быць узведзенымі ў квадрат, а таксама чакалася абвастрэнне кутоў у вызначаным любоўным трохкутніку Верабей–Элізабэт–Уільям.

Тым часам “Піраты Карыбскага мора 3” цешыць няўжо што на палову з 300 мільёнаў свайго бюджэту. Раш, здаецца, перагульвае Дэпа!... Спецэфекты шыкоўныя, але фільм у цэлым цягнецца як гума. У гэтым сэнсе апраўдана будзе сказаць, што прагляд трэйлераў гэтага фільму досыць паспяхова замяняе саму кінастужку. Усё лепшае там ужо нарэзана, і па-за кадрам застануцца абарваныя хвасты з папярэдняй часткі ды не той гумар, на які разлічваў глядач, а дыялогаў у карціне шмат, нават занадта!

Тым жа, хто вырашыць паглядзець трыквел, раю даглядзець да канца, бо фільм не завяршаецца тытрамі.

Такім чынам,

Назва: Піраты Карыбскага мора 3: На краі Свету / Pirates of the Caribbean: At World's End

Год: 2007

Рэжысёр: Гор Вярбінскі

Вердыкт: праект не бударажыць і не дзівіць уяўленне, але завяршыў трылогію ў цэлым годна. Глядзець тым, хто бачыў "Куфар мерцвяка" і цікавіцца, што тамака далей!