12.30 “Спяшайцеся прыехаць да нас набыць квіткі, яны пакуль ёсць,” –  паведамілі ў касе Гродзенскай  абласной філармоніі. Праз паўгадзіны ніводнага квітка ўжо не засталося. А заля філармоніі здольна змясціць каля 500 чалавек.

Нагадаем, што сёння ў Гародні ў межах тура па Беларусі адбудзецца “развітальны” канцэрт гурта NRM. Такім чынам музыкі развітваюцца з зімой і сустракаюць вясну.

Канцэрт пачнецца  а 19 гадзіне ў  залі філармоніі.

Лявон Вольскі адказаў на пытанні “ТС” па тэлефоне:

–         Чым канцэрт у Гародні будзе адрознівацца ад іншых канцэртаў тура?

–         У нас не бывае дзвух аднолькавых канцэртаў. У кожным горадзе ўсё па-іншаму: іншая публіка, іншыя песні.

–         Чаму вы абралі Гародню сярод іншых абласных цэнтраў?

–         Мы вельмі любім ваш горад.

–         Ці былі якія перашкоды пры арганізацыі канцэрту з боку гарадзенскіх уладаў?

–         Амаль не было. Толькі спачатку ваш ідэалагічны аддзел супраціўляўся, але мы хутка вырашылі гэтае пытанне.

–    Ці далучыцеся вы да напісання аульнанацыянальнай беларускай дыктоўкі?

–      З вялікім задавальненнем.

На 20 сакавіка па календары  сапраўды прыпадае  японскае свята Хіган – Дзень вясновага раўнадзенства. Яно падобнае да нашага свята Дзяды. У гэты дзень японцы ня толькі сустракаюць вясну, але і памінаюць продкаў.  Хіган перакладаецца як “той свет, куды пайшлі нашыя продкі і дзе пасяліліся іх душы”. Напярэдадні свята японцы праводзяць прыбіраюць ў хаце, паўсюль ставяць кветкі, гатуюць рытуальныя стравы, прыходзяць да могілак продкаў.

Надзея Завіноўская

Фота: Лана Руднік