25 сакавіка 1992 года ў Гродна выйшаў першы нумар газеты “Пагоня”.

Адна з першых незалежных газет у Беларусі пачыналася як рэгіянальны агляд: Беласток, Горадня, Вільня, і выходзіла 2 разы на тыдзень. Потым “Пагоня” трансфармавалася ў агульнарэспубліканскі штотыднёвік. Газета прываблівала чытачоў выразнай беларускай пазіцыяй і бескампраміснасцю.

Наклад “Пагоні” №37 за 2001 год арыштаваны ў друкарні за артыкулы, прысвечаныя прэзідэнтскім выбарам. Пазней арыштаваны рахунак, маёмасць газеты. 12 лістапада “Пагоня” зачынена паводле рашэння Вышэйшага Гаспадарчага Суда.

Узгадвае рэдактар “Пагоні” Мікола Маркевіч: “Усчаліся правакацыі: білі вокны, запуджвалі, але газета выходзіла ў інтэрнэце. І тады вырашылі пасадзіць мяне і Паўла Мажэйку. Доўгі час цягнуліся суды, ніводзін суддзя не хацеў браць грэх на сябе, бо было зразумела, што мы не рабілі злачынства, а толькі выконвалі свае прафесійныя абавязкі. А пасля суддзя знайшлася, і 1 верасня мы адправіліся адбываць пакаранне. “За паклёп на прэзідэнта Рэспублікі Беларусь абцяжараны абвінавачваннем яго ў здзяйсненні асабліва цяжкага злачынства” – так пазначана ў прысудзе. Але, нягледзячы на тое, што мы з’ехалі, “Пагоня” ўсё адно працягвала жыць”.

Сёння, у дзень нараджэння “Пагоні”, Мікола Маркевіч упэўнены, што рана ці позна газета будзе адроджана ў новай якасці. “Гэта бачыцца мне нейкім мультымедыйным праектам, дзе будзе і папяровы варыянт, і тэлевізійны, і радыё, і інтэрнэт. Гэтая інфармацыйная ніша дагэтуль не занятая. У людзей ёсць запыт і патрэба ў беларускім поглядзе на падзеі, у беларускім па духу і менталітэце масавым выданні, разлічаным не на вузкае кола людзей, а на шырокую аўдыторыю.

Вельмі рады, што дзень народзінаў “Пагоні” мы ў свой час прымеркавалі да гадавіны абвяшчэння БНР. Гэта значыць, што пра юбілей “Пагоні” цяпер забыць цяжка, як і пра магутную праяву духу тых беларусаў, якія ў 1918 годзе абвесцілі незалежнасць нашай дзяржавы”.

Чытайце “Пагоню” у інтэрнэце: pahonia.org .  

Кася Крот