Стаматолаг Наталля Кіман падала ў суд на рэдакцыю “Газеты Слонімскай” і яе карэспандэнта Сяргея Васільева за артыкул “Вырваны зуб амаль не стаў прычынай смерці”.

Нагадаем, што паводле публікацыі, жыхарка Слоніма Галіна Мароз ледзьве не памерла пасля таго, як лекар Наталля Кіман выдаліла ёй зуб, а пасля гэтага з-за памылкі стаматолага перанесла некалькі аперацый у абласным шпіталі. У студзені 2008 года суд прызнаў стаматолага вінаватай і прыняў рашэнне выплаціць пацярпелай 700 тысяч рублёў кампенсацыі.

Першае судовае паседжанне павінна адбыцца 26 траўня.  Наталля Кіман патрабуе ад рэдакцыі і асабіста ад Сяргея Васільева па 5 мільёнаў рублёў.

Сяргей Васільеў  спадзяецца, што выйграе суд, бо паводле судмедэкспертызы, якая праводзілася ў Мінску, ды іншых справаў стаматолаг прызнана вінаватай.  “10 мільёнаў яна патрабуе, напэўна таму, што шмат патрацілася на судовыя справы і на аплату экспертызы. Самае непрыемнае ў гэтай справе тое, што ў дзень судовага паседжання ў мяне пачынаецца сэсія і я павінен знаходзіцца ва ўніверсітэце. А яны ня вельмі будуць радыя, пабачыўшы паперу з суда”.

Зараз Наталля Кіман працуе ў адной з прыватных клінік тэрапеўтам. З дзяржаўнага месца працы, дзе працавала хірургам, яна звольнілася па сваім жаданні яшчэ да суда ў студзені.

Надзея Завіноўская