Аўтограф-сесія аўтара “Магдэбургскай Гародні” Юры Гардзеева адбудзецца ў Гародні 24 ліпеня.

У памяшканні Таварыства Беларускай Школы ўсе ахвотныя могуць здабыць кнігу і атрымаць аўтограф аўтара. Мерапрыемства будзе доўжыцца з 17 да 19 гадзін.

"Магдэбургская Гародня (сацыяльная тапаграфія і маёмасныя адносіны ў 16—18 ст.)" -  першая кніга серыі "Гарадзенская бібліятэка", што выдаецца Гарадзенскім Рухам “За Свабоду” пад патранатам Аляксандра Мілінкевіча. Багата ілюстраванае выданне прысвечана пытанням планавання і забудовы Гародні ў перыяд, калі горад карыстаўся Магдэбургскім правам (з 1496 года да апошніх дзён Рэчы Паспалітай у канцы XVIII стагоддзя); сацыяльнай тапаграфіі гродзенскіх вуліц і плошчаў; саслоўных і маёмасных адносін, а таксама сацыяльнай стратыграфіі і прафесійнай структуры горада.

Паводле прэс-рэлізу Гарадзенскага Руху “За Свабоду”