З мэтай пратэсту супраць прыняцця новага закона «Аб сродках масавай інфармацыі» ў другім чытанні Палатай прадстаўнікоў Нацыянальнага сходу ГА «Беларуская асацыяцыя журналістаў» ініцыявала акцыю «Гадзіна маўчання», якая доўжылася сёння з 12.00 да 13.00.

Дзесяткі сайтаў адгукнуліся на заклік БАЖ не абнаўляцца на працягу гадзіны і размясціць чорныя банеры на знак пратэсту. Сярод удзельнікаў акцыі — сайты «Хартыя-97», Радыё «Свабода», «Еўрапейскае радыё для Беларусі», «Белорусский партизан», Радыё «Рацыя», nn.by, «Салідарнасць», «Заўтра тваёй краіны», generation.by, сайт ПЦ «Вясна», сайт «Народнай волі», ximik.info (Наваполацк) і шмат якія іншыя рэсурсы. Інфармацыю пра акцыю распаўсюдзілі агенцтва БелаПАН, парталы tut.by і Телеграф. by, «Белорусские новости», ucpb.org, расійскія сайты (Lenta.ru, Цэнтр экстрэмальнай журналістыкі і іншыя).

Мэтай акцыі было — выказаць салідарны пратэст супраць паспешлівага прыняцця закона «Аб СМІ» без правядзення грамадскіх слуханняў і міжнароднай экспертызы, паказаць карыстальнікам Байнету, што пагроза знікнення крыніц незалежнай інфармацыі ў Сеціве сёння надзвычай рэальная.

Закон, у прыватнасці:

– прадугледжвае рэгістрацыю інтэрнет-выданняў і кантроль за Інтэрнетам з боку Міністэрства інфармацыі і пракуратуры;

– патрабуе перерэгістрацыі ўсіх медыяў пасля ўступлення закона ў сілу;

– значна пашырае магчымасці закрыцця ўладамі СМІ;

– ускладняе дзейнасць і павялічвае ціск на незалежных журналістаў і карэспандэнтаў замежных медыяў.

Па інф. агентстваў