Гарадзенская грэка-каталіцая парафія Маці Божае Фацімскай у нядзелю адзначыла  сваё парафіяльнае свята – 91-ую гадавіну пачатку Фацімскіх з’яўленняў.

На ўрачыстай літургіі гарадзенскаму душпастыру саслужылі айцец Пахом Кавалёў з Менску і айцец Сяргей Стасевіч – святар беларускай місіі ў Лондане. Пасля літургіі заснавальнікі парафіі распавялі пра адраджэнне Грэка-Каталіцкай Царквы ў Гародні. Прывітальнае слова даслаў першы душпастыр парафіі айцец Віктар Данілаў. Былы вязень сталінскіх лагероў, падпольна высвячаны ўкраінскім біскупам, а.Віктар патаемна служыў  у Гародні з 1972 года і ўзначаліў зноў створаную тут у 1992 годзе грэка-каталіцкую суполку. Праз гэтага святара гарадзенская парафія атрымала тытул Маці Божай Фацімскай.

13 траўня 1917 году Маці Божая з’явілася тром дзецям у Партугальскім мястэчку Фаціма. Яна прадказала падзеі, якія меліся неўзабаве стацца – рэвалюцыю ў Расіі, паўстанне бязбожнай дзяржавы (СССР), а таксама яе падзенне. Багародзіца заклікала да асаблівай малітвы за навяртанне Расіі, маючы на ўвазе ўсе народы тагачаснай Расійскай імперыі, у склад якой уваходзіла і Беларусь.

Сёлета Гарадзенская грэка-каталіцкая парафія адзначае сваё 16-годдзе. Да скасавання Вуніі ў 19 стагоддзі, у Гародні,  акрамя парафіі, дзейнічалі два базыліянскіх грэка-каталіцкіх кляштара: жаночы Раства Багародзіцы і мужчынскі Барыса-Глебскі.

Кася Крот