Арганізатары перанеслі дату мерапрыемства на 22 сакавіка таму, што ў дзень правядзення беларускай дыктоўкі каталікі святкуюць Вялікдзень.
 

“Хачу папярэдзіць людзей не баяцца дыктоўкі, бо яе сэнс не ў праверцы ведаў   беларускай мовы. Гэта у першую чаргу акцыя салідарнасці беларусаў па  ўсім свеце,” – кажа адзін з арганізатараў мерапрыемства Павел Мажэйка.

Нагадаем, што акцыя прысвечана 90-годдзю абвяшчэння БНР і будзе праходзіць па ўсей краіне 23 сакавіка. У Гародні беларускую дыктоўку ладзяць “Таварыства беларускай мовы імя Францішка Скарыны” і “Таварыства беларускай школы”.

Дыктоўка будзе чытацца ў памяшканні ТБШ кожную гадзіну з 12.00 да 16.00. Тэкст агучаць вядомыя у горадзе людзі - пісьменнікі і артысты. Пакуль дакладна вядома, што гэта будзе Віктар Шалкевіч. Таксама перамовы вядуцца з Данутай Бічэль-Загнетавай.

Арганізатары рыхтуюць падарункі для самага маладога і старэйшага ўдзельнікаў дыктоўкі. Астатнім на памяць застанецца асадка ўдзельніка. Той, хто пажадае паўдзельнічаць у конкурсе на лепшае валоданне беларускай мовай, зможа звярнуцца у спецыяльную камісію па падвядзенню вынікаў. Пераможца атрымае ўзнагароду.

Па выніках дыктоўкі арганізатары плануюць правесці фотавыставу матэрыялаў па Беларусі, а таксама па тых краінах, дзе жывуць беларусы, і ў офісе ААН у Нью-Йорку.

Далучыцца да напісання беларускай дыктоўкі можа любы ахвотны.

Папярэдне зарэгістравацца можна ў офісе ТБШ, што па адрасе вул. Будзенага, 48а-44, ці па тэлефоне 74-44-28.

Надзея Завіноўская