Урачыстае святкаванне ладзіцца ўжо трэці год запар.

Яно адбудзецца 28 сакавіка ў начным клубе “Флінт”. У праграме прадугледжана танцавальнае шоў, эратычнае відовішча, падарункі ад партнэраў і спонсараў, конкурсы, спецыяльная праграма ад  Dj Melnik,  Dj Marta,  Dj Vanoid.

Імпрэза пачнецца  а 23 гадзіне і будзе працягвацца да шостай раніцы. Кошт квітка да канца тыдня  - 25 тысяч рублеў, пасля - 30 тысяч.

“ТС” звязаўся з адміністратарам  Гарадзенскага форума спадаром Аляксеем Радсам:

- Колькі гасцей вы разлічваеце прыняць?

- Прыкладна каля 200, можа нават 250 чалавек. Пакуль вядомыя імены 150 гасцей.

- Ці будуць сярод іх агульнавядомыя гарадзенцы?

-Дык мы ўсе адзін аднаго ведаем. Гэхта добрая нагода пабачыцца.

- Што новага з’явіцца на форуме ў бліжэйшы час?

- Падрабязна  пра ўсе я  раскажу 28 сакавіка на імпрэзе. Пакуль магу сказаць толькі, што на форуме адбудуцца некаторыя тэхнічныя змены. Таксама трэба арганізацыйна неяк упарадкаваць форум, прыбраць некаторыя тэмы, абмежаваць іх.  І яшчэ - часцей сустракацца офлайн. Напрыклад, напярэдадні Дня аховы дзіцяці плануем правесці акцыю“Дапамога – дзецям” . А то неяк мы пра яе забыліся.

 - Чаго гарадзенскаму форуму не хапае?

- Зараз на форуме шмат пустога “тропа”. Я не хачу адміністратыўна ўплываць на гэты працэс, абмяжоўваць людзей. Але мне не хапае сур’езных онлайн абмеркаванняў і іх офлайнавых  працягаў. Такія зараз існуюць, некаторыя выраслі нават у свае асобныя аб’яднанні, на жаль, іх няшмат.

Надзея Завіноўская