Дзевяць год таму ў фінале футбольнай Лігі чэмпіёнаў здарыўся маленькі цуд – “Манчэстэр Юнайтэд”, які прайграваў нямецкай “Баварыі” 0-1 у пару апошніх хвілінаў прайгранай, здавалася, гульні здолеў забіць два галы і вырваць перамогу. 10 траўня такі ж сцэнар паўтарыўся ў Гродне.

Канечне, “Нёман” – не “МЮ”, а сталічны “Лакаматыў” – не “Баварыя”, ды й чэмпіянат Беларусі не раўня Лізе чэмпіёнаў. Абедзьве каманды толькі ў мінулым туры атрымалі свае першыя перамогі ў сёлетнім сезоне. Больш блізкімі да другой перамогі былі госці. Першы іх удар па браме Ашыхміна скончыўся голам Швыдакова. У другой палове Дзянісюк меў магчымасць зняць усе пытанні наконт выніку, але не забіў пенальці (брава Ашыхміну!). Прамалінейная гульня гаспадараў у атацы з разлікам на навесы ў штрафную суперніка ды добрую гульню галавой Кавалёнка доўгі час была безвыніковай – то перадачы перахопліваліся абаронцамі, то нападнік марнаваў шанс за шансам. Але, як кажуць, вада камень точыць. Арбітр дадаў 3 дадатковыя хвіліны да асноўнага часу гульні, калі чарговы навес разумніцы-Жувенала ўрэшце ператварыўся ў гол Кавалёнка. Не паспелі сціхнуць апладысменты на трыбунах, як наступная атака гаспадароў скончылася другім голам – гэта Аляксандр Алумона падсцярог адскок мяча і таксама галавой скіраваў таго ў сетку! Ледзь не ўсе гульцы абедзьвух каманд, абхапіўшы галовы рукамі (адныя ад роспачы, другія – ад неверагоднай фартуны) ляжаць на траве, трыбуны, якія яшчэ пяць хвілінаў таму не шкадавалі крыўдных словаў у адрас гульцоў і трэнераў “Нёмана”, скандуюць “Малайцы! Малайцы!”. Finita la comedia!

10 траўня. “Нёман” – “Лакаматыў”, Мінск 2-1

“Смаргонь” – БАТЭ, Барысаў 0-0

Пасля апошняга туру чэмпіянату “Смаргонь” займае 4-е, а “Нёман” – 10-е месцы ў турнірнай табліцы.

Вітаўт Руднік