Учора грамадскія актывісты Гародні традыцыйна адзначылі перамогу войск ВКЛ у Грунвальдскай бітве.

Каля 20 чалавек сабраліся каля помніка “Пагоня на Грунвальд”, які знаходзіцца ля Каложскай царквы. Прысутныя ўсклалі белыя і чырвоныя гваздзікі ў памяць пра мужных ваяроў, выклалі са свечак шасціканцовы крыж. Гарадзенскі гісторык і краязнаўца Уладзімер Хільмановіч выступіў з невялікай прамовай з нагоды свята.

Асаблівасцю сёлетняга ўшанавання Грунвальдскай перамогі было тое, што на свяце адсутнічалі супрацоўнікі міліцыі.

Нагадаем, што 15 ліпеня 1410 году блізу прускага горада Грунвальд адбылася вырашальная бітва “Вялікай вайны” 1409-1411 гг. паміж Вялікім княствам Літоўскім і Польшчай з аднаго боку і Тэўтонскім ордэнам з другога. Бітва скончылася поўнай паразай Тэўстонскіх войскаў.

Сашка Верацейчык