На мінулым тыдні ў жыхароў Гродна была магчымасць убачыць вялікую частку сваіх знаёмых у адным месцы. І гэтым месцам стаў новы і першы гіпермаркет «Алмі», у які ўжо каторы дзень ходзяць гарадзенцы нібыта за пакупкамі, нібыта на экскурсію…  

Што дзеялася побач з «Алмі» і ў яго сценах на дзень адкрыцця! У дзвярэй стаялі натоўпы людзей – з пяці гадзін людзей перасталі запускаць, каб пазбегнуць няшчасных выпадкаў – яшчэ больш вялікія натоўпы спрабавалі рухацца ў самім гіпермаркеце. Разгубленыя супрацоўнікі крамы бегалі з аднаго канца ў іншы. Прадаўцы, ужо парадкам стаміўшыяся, спрабавалі працаваць з хуткасцю света, што не заўсёды атрымоўвалася – узнікалі блытанні з коштамі. «Крама адкрылася ў дзесяць хвілін трэцяга. Першыя паўгадзіні людзей было трохі, а потым лінуў такі натоўп…Мы не чакалі такога наплыву людзей», – так пракаментаваў тое, што адбывалася, адзін з супрацоўнікаў. А чаго чакалі і чаго не чакалі самі пакупнікі, мы паспрабавалі высвятліць у нашым апытанні.

Надзя: Мне вельмі спадабалася, так хораша. Сапраўды, я не думала, што гіпермаркет атрымаецца такім мадэрнавым, сучасным. І еўрапейскім. Тут можна нават проста пагуляць з сябрамі. Ды і кошты досыць нізкія.

Ядвіга: Я б не сказала, што супер – не зусім тое, што я чакала і чаго жадала. Кошты высокія, асабліва на мясную прадукцыю. Мне здаецца, «Карона» усё ж такі лепей.

Юля і Паша: Тое, што мы ўбачылі, нам спадабалася. Зараз тут шмат людзей, але ўсё роўна, гэта добрая задумка. Чагосьці такога мы і чакалі, і чагосьці такога не хапала гораду.

Саша: Мне здаецца, гэта вельмі добры гіпермаркет, і ён будзе папулярным. З «Каронай» яго параўноўваць нельга – гэта зусім розныя магазіны. Што асабліва спадабалася? Дзіцячы пакой! Проста супер!

Івонна і Андрэй: Як і чакалі – няма ніякай арганізаванасці, шмат народу, суматоха…Зусім не па-еўрапейску. Колькі дзён вакол гэтага «Алмі» будзе шуміха, але «Карона» нам падабаецца больш.

Рома: Я не ведаў, што тут будзе, але лічу, што магазін атрымаўся класным! З сябрамі тут весела гуляць!

Мікалай: Як у Маскве – прыгожа, разумна, толькі … бесталкова!

Аляксандра: Кошты дапушчальныя, выбар вялікі. Унуку спадабалася, ды і мне таксама.

Я думаю, што гэты гіпермаркет выцесніць «Карону». Як бачыце, многія параўновалі «Алмі» з «Каронай», але параўнанні былі рознымі. Хто  будзе мець рацыю – пакажа час.

Дар’я КУЛІНКА Фота Вольгі ДУБРОЎШЧЫК