Хутка ў Гродна з’явіцца новы тэлеканал. Чаго чакаюць ад яго гарадзенцы і якім бы яны хацелі яго бачыць?! З гэтымі пытаннямі мы звярнуліся да месцічаў....

Не ўсе былі згодныя фатаграфавацца, таму  некаторыя адказы будуць «бязлікія»

Зміцер, студэнт: Не гляджу гродзенскае тэлебачанне. Яно павінна быць па-першае: карысным. Па-другое: цікавым – звязаным з гісторыяй горада, яго выдатнымі мясцінамі. Уладзімір, студэнт: Інфармацыя пра новы канал да мяне не даходзіла. Калі будзе, то трэба больш ток-шоў, спартыўных мерапрыемстваў рэгіёна. Хутчэй за ўсё гэта будзе таннае ток-шоў, бо на дарагія бракуе грошаў (смяецца). Магчыма больш увагі звярнуць як звычайна раёнам розным, развіццю аграрнага сектара і ўсяго-усяго-усяго. Мне здаецца будзе нешта накшталт «Сельскі час». Буду глядзець, калі будзе цягнуць у Мастах. Павінна быць цікавым (смяецца): больш творчых задумак, аўтарскіх праектаў, не павінна быць шаблонных перадач, што змяняюць назву, але сутнасць адна і тая ж на ўсіх каналах, якія ідуць у прайм-тайм. Магчыма больш перадач у прамым эфіры. Магчыма, забаўляльных перадач з рэгіянальным каларытам Прынемання.

Юля, хатняя гаспадыня ў дэкрэтным адпачынку: Я сама не з Гродна. Пра новы канал не чула. Лепш паменш рэкламы і пабольш культурных мерапрыемстваў, інфармацыі. Але самае галоўнае, каб рэкламы паменш, таму што ў прынцыпе падрастаючае пакаленне таксама глядзіць тэлевізар, а рэклама не навучае, яна наадварот правакуе моладзь.

Іра, школьніца: Мабыць, цікавым. Перадач якіх-небудзь, фільмаў, ну, што-небудзь...

Пётр Рыгоравіч, пенсіянер: Будзем глядзець (разводзіць рукамі). Пабачым, што там будуць паказваць (усміхаецца). Не ведаю, усё падрад. Што цікавей. Не ведаю. Гляжу НТВ. Усё падрад: кіно, навіны гляжу. Усё.

Ігар, выкладчык: А хто будзе рабіць гэта тэлебачанне?! Яны што-небудзь новае скажуць, што-небудзь свежае нам?! Калі ён (новы канал) будзе незалежным і без цэнзуры, то, я думаю, што шмат чаго цікавага яны раскажуць і пакажуць, а вось калі гэты канал будзе рабіць гродзенскае тэлебачанне, то мы будзем чуць і бачыць тое ж, што і па БТ, і па гродзенскім тэлебачанні, і па ОНТ і астатніх.

Яўген, студэнт: Канал будзе правінцыяльным, хутчэй за ўсё, не такім, якім хацелася б. А хацелася б, каб гэта былі максімальна цікавыя перадачы (не шаблонныя, як на нашым тэлебачанні) і якія-небудзь цікавыя фільмы.

 
Міхаіл, паляўнічы: Каб больш праўды казалі людзям пра жыццё нашае.
Ніна Анатольеўна, супрацоўнік скурвендыспансэру: Наогул гродзенскае тэлебачанне вельмі добра стала працаваць: і фільмы добрыя, і пытанні вельмі добрыя падымаюцца, такія вось як сацахова, напрыклад. Мне падабаецца асабіста. Хацелася б пабольш, каб развівалася пытанне сацаховы нашых грамадзян. Самі ведаецце, што і заробкі ў нас зараз не асабліва такія, як кажуць... людзі сядзяць неяк... ёсць і адзінокія сем’і... таксама хацелася б даведацца, якія ільготы ва ўсіх гэтых адносінах... Нехта гэта падымае, нехта – не... Хацелася б ведаць куды ісці наконт гэтага.

Андрэй і Паша, «вучымся і працуем, сумяшчаем прыемнае з карысным»: Галоўнае, што яно развіваецца, так?! Фільмы нармалёвыя. Проста каб нешта новае, што ў кінатэатрах толькі.

 
Проста жанчына: Уяўлення не маю пра што можна казаць. Ну, аб горадзе шо-небудзь,  вось пераўладкаванне, абсталяванне чаго-небудзь. Ну... пра што яшчэ можна?!.. Ды што ў Гродна можа быць?! (смяецца)

Ананімны пенсіянер: А вы што, запісваеце?... Сваю вобласць болей. Ну што дзеду яшчэ трэба?! (смяецца). Пра сельскую гаспадарку (адмахнуўся).

Артур: Хацелася б, каб ён (новы канал) быў больш інфармацыйным, больш аб’ектыўным, шчырым, народным.

Марыя Аляксандраўна, пенсіянерка: Чакаю самага лепшага. Навіны ўсе. Усё, што адбываецца ў нашай Беларусі. Ну, па Гродна... Можа, новыя паліклінікі дзе будуюцца, як для нас пенсіянераў. Шпіталі. Недзе паляпшэнне, як напрыклад цяпер у паліклініках стала лепш. Ну і ўсё такое, што яшчэ?!... Я люблю глядзець кіно. Пра жыццё, не баявікі, іх адразу выключаю. І пра моладзь нават, і ўсё такое.

 
Такім чынам жыхары Гродна не хочуць бачыць чарговага шаблоннага правінцыяльнага праекта, але чакаюць добрае кіно і праўдзівую, карысную інфармацыю.

Марат ГРЭСЬ і Андрэй БАРТАШЭВІЧ