Пад лозунгам “Спынім разбурэне Гародні” адбыўся канцэрт вядомага барда, акцёра і паэта Віктара Шалкевіча. Сам музыка падкрэслівае, што зараз адбываецца менавіта разбурэнне, а не рэканструкцыя.

Канцэрт пачаўся з невялікага ўступа, ў якім арганізатары заклікалі прысутных зрабіць ўсё, каб горад не ператварыўся ў груду селікатных блокаў. Гучалі вядомыя песні Віктара “Ганка з Пагулянкі”, “Самавар”, “Патрыятычнае танга цноты” і інш., якія гучалі на беларускай, літоўскай і польскай мовах. Канцэрт быў поўны жартамі і смехам. Скончыўся ён песняй “Горад”, якая нагадвала пра сучаснае становішча Гародні.

На пытанне “Ці падабаецца што-небудзь з перабудованага” Віктар адказаў, што яму падабаецца, як “адкрылі “ Фарны касцёл, але ж цалкам Шалкевіч незадаволены перабудовамі. “Галоўнымі ў такіх справах павінны быць археолагі і гісторыкі - гаворыць бард. – Паглядзіце, ў нашым горадзе няма сэрца, таму што сэрца горада ва ўсіх цывілізованных краінах – ратуша. І калі разабрацца, рэканструкцыяй павінны займацца тыя, хто любіць Гародню, а не жадаюць толькі набіць кішэні грашыма! А такія канцэрты даюць людзям магчымасць адчуць, што яны не адзінокія ў сваіх думках”.

Рыгор Луцэнка.