У студзені пачаўся чарговы восеньска-зімовы прызыў-2008 у войска. Менавіта ў  гэты час на вуліцы Азёрская шаша абласнога цэнтра можна сустрэць  вялікую колькасць астрыжаных маладых мужных хлопцаў, якія праходзяць медыцынскую камісію, на тэрыторыі абласнога  прызыўнога пункта.

Трапіўшы на тэрыторыю прызыўнога пункта, я накіравалася на трэці паверх, дзе знаходзяцца кабінеты дактароў, праз рукі якіх праходзяць медыцынскі агляд тыя, каму заўтра будзе даверана абарона мірнага жыцця нашай краіны. Усяго юнакам неабходна прайсці восем спецыялістаў-медыкаў,  якія дадуць належнае сведчанне здароўю прызыўніка: няўролаг, стаматолаг, акуліст, аталарынгіёлаг(ЛОР), хірург, тэрапеўт, дэрматолаг і псіхолаг – гэта поўны пералік тых, хто адказвае за здароўе ў беларускім войску.

Я ж завітала ў кабінет урача-стаматолага. Вядома, што  здаровыя, моцныя зубы – заклад агульнага здароўя будучага воіна. Пасля некалькіх адказаў на мае пытанні доктара Ноны Вікенцьеўны Жук, высветліла некалькі цікавых момантаў. Па-першае, стаматолагам нарэшце прывезлі новыя сучасныя інструменты, з якімі можна лепш і больш дасканала  рабіць агляд кожнага юнака. Па-другое, вылучана цэлых два пакоі (замест аднаго) для стаматалагічнага агляду прызыўнікоў. Але  былі і дрэнныя навіны:

– На сённяшні дзень у моладзі заўважана шмат генгевітаў (запаленне дзёснаў), вялікае мноства хворых зубоў, якія патрабуюць неадкладнага лекавання, – кажа доктар. – На жаль, тут жа атрымаць лячэнне хлопцам не пашчасціць, так як удзень урач прымае больш за 150 прызыўнікоў (іх агульная колькасць падчас прызыву складзе 1500-1600 чалавек) і кожнага палекаваць проста не мае часу і фізічнай магчымасці.

Напрыканцы застаецца толькі зрабіць выснову, што першыя дні вайсковай службы баец правядзе не з аднаслужбоўцамі за вывучэннем вайсковай справы, а з ваенным доктарам.

Наталя АСТРОЎСКАЯ