Такая колькасць таксовак наводзіла на розныя думкі… Часова перакрыты рух грамадскага транспарту? Ці ўвогуле цяпер гэта адзіны магчымы сродак перамяшчэння па горадзе? Усе разам спазняліся ці нейкая кампанія праводзіць акцыю кшталту “Таксі за дзесяць адсоткаў ад агульнага кошту! Толькі адзін дзень!”? Бязглуздзіца… Ды і на справе ўсё куды прасцей!

Конкурс таксістаў – з’ява для Горадні ўжо не новая. Ён праводзіцца штогод, аб ім ведаюсь, да яго рыхтуюцца, яго чакаюць… 22-га верасня адбылося трэцяе па ліку спаборніцтва за званне лепшага таксіста года, арганізатарам якога выступіў міжрайонны аддзел ДАІ. Прэтэндэнтаў на яго атрыманне было сямнаццаць, трое з якіх - асобы жаночага полу.

Першы конкурс быў даволі просты. Дакладней, простым ён падаваўся: правілы дарожнага руху гэта сур’ёзна. Але правы ні ў каго не адабралі– а гэта ўжо няблага.

Фігурнае манеўраванне – справа даволі звыклая. Вось толькі не кожны дзень убачыш, як вадзіцель, высунуўшыся з акна, перастаўляе стаканы з вадой з месца на месца, асабліва, калі справа датычыцца вялізнай Fiat Alhandra. Трэці конкурс – замена задняга кола на хуткасць. Калі удзельніка запрашалі “на нізкі старт”, ні аднаго жаночага імя не прагучала. Іх чакала нешта мегаэкстраардынарнае…

Мілым спадарыням было прапанавана зрабіць макіяж. Але ж не сабе – сваім “сябровачкам”, на што было дадзена дваццаць хвілін. Ужо праз пяць пачуліся першыя заявы аб “фінішы”, але ж храмасома X зрабіла сваю справу: жаданне падправіць вось тут і вось там і яшчэ раз тут і зноў там вымусілі судзейскую камісію даць прыгажуням бонусную хвіліну, бо ў дваццаць ніхто не ўклаўся. Карацей, усё як у людзей…

Канечне б, феменісткі Сан-Францыска наўрацці б на такое забыліся, але ж паглядзець было на што: разнакаляровыя плямы, велізарныя вочы на капоце, фары з падведзеным контурам і доўгімі закручанымі вейкамі і крэатыўныя надпісы: “грошы наперад”, “кантроль цвярозасці пасажыраў”, “ёсць месца ў багажніку” і нараэшце “я люблю ДАІ”…

Як справядліва заўважыў вядучы, усе жанчыны атрымалі як мінімум трэцяе, а значыць прызавое месца.

А вось гульні для гледачоў так і не адбылося. Па словах таго ж вядучага, усяму віной мікрафон, якога так палохаюцца людзі – нават жазло не канкурэнцыя!

Па выніках асноўных спаборніцтваў першае агульнакаманднае месца заняла кампанія “Веста”, а героем ўсяго мерапрыемства стаў Дзмітрый Маціевіч, прадстаўнік “Таксі “Альянс”. За рулём Дзмітрый з 1998-га года. За гэты час ён “прабег” 280 000 кіламетраў, пры ўмове, што таксістам працуе два гады (пешкі ён ходзіць, я пытала :)). У падобным спаборніцтве ўдзельнічае ўпершыню.

- Вельмі хацелася паўдзельнічаць і ў мінулым годзе, але, нажаль, не атрымалася: іншыя справы ў той дзень былі… Затое на гэты раз мяне адпраўлялі усе, нават, са словамі “Без перамогі не вяртайся!” – Кажа Дзмітрый.

Алінка Новік

фота аўтара