Ёсць прыказка, што ў сваёй хаце і сцены дапамагаюць. Магчыма, камусьці і так, але не гарадзенскаму “Нёману”. Чатыры хатнія гульні і чатыры паразы. Чарговую “Нёман” пацярпеў ад “Гомеля” 20 жніўня.

І хоць гарадзенскія хакеісты мелі перавагу, лік усё ж  адкрылі госці: Есаўлаў аддаў на Задзялёнава, той - Валую, які, ў сваю чаргу, моцным шчаўчком увагнаў дыск у браму.

Гарадзенцы ў адказ абрынулі шквал атак. На жаль, безвыніковы.

За тры хвіліны да перапынку на “пятачку” “Гомелю” і ўвогуле ўтварыўся натоўп: уся гарадзенская тройка нападнікаў і пара абаронцаў з боку гасцей. Але як ні старалася тройка Калачова заштурхаць дыск у браму Бяссонава, нічога не атрымалася.

Другая дваццаціхвілінка пачалася з неакцэнтаванага кідка гомельцаў, а менавіта Ісаенкі. Госці адчувалі сябе некалькі вальяжна і рабілі ўсё без імпэту. Гэта ледзь не прывяло да змены ліку. На 7-ай хвіліне гарадзенцы, толькі замацаваўшыся ў зоне суперніка, атакавалі. Яноўскі кінуў і шайба слізганула ў браму, але брамнік зваліўся і паспеў прыціснуць дыск целам. Суддзя, праглядзеўшы відэапаўтор, толькі развёў рукамі.

Гарадзенцаў гэты момант завёў яшчэ больш. На восьмай хвіліне здалёк кінуў Кручынін. Бяссонаў быў на месцы. Праз хвіліну атакаваў Глінкін, але шайба трапіла акурат у штангу. Крыху пазней Малашкевіч, ледзь трапіўшы ў зону, ударыў. Аднак вопытны “кіпер” гасцей быў надзвычай пільны і забіць “Нёману” аніяк не атрымлівалася.

Як кажуць, калі не забіваеш ты, забіваюць табе. Народнае выслоўе пацвердзіў малодшы Касціцын, калі на 12-ай хвіліне выйшаў сам на сам з галкіперам і падвоіў лік. Гаспадары мелі не адну магчымасць скараціць адрыў у ліку, але дыск проста-такі “не ішоў” у браму “Гомеля”.

 “Прабіць” Бяссонава “нёманцы” змаглі толькі на пачатку заключнай часткі гульні. Шайба Саяпіна вярнула надзею, але яе канчаткова знішчыў Крывамаз, які, моцна шчоўкнуўшы здалёк, адправіў шайбу ў дальні ніжні вугал. У астатні час гарадзенцы так і не змаглі ні адгуляцца, ні нават скараціць лік.

Такім чынам, “Гомель” стаў адным з фіналістаў кубка Беларусі. Другі фіналіст вызначыўся ў гульні паміж сталічнымі “Юнацтвам” і “Керамінам”. Перамог апошні з лікам 5:1.

“Нёману” засталося правесці толькі адзін матч у гасцях у “Брэста” 23 жніўня.

Іна Хітрушка