Лёсаванне заўсёды прыносіць сюрпрызы. Камусьці прыемныя, а камусьці і не вельмі. Менавіта такога кшталту “сюрпрыз” чакаў зборную Беларусі па футболе ў час нядзельнага лёсавання адборачнага турнірy чэмпіянату свету. Група, у якую трапілі беларусы, не проста складаная: спецыялісты і галоўны трэнер каманды Бернд Штанге назвалі яе “групай смерці”.

Акрамя беларускай зборнай удзельнікамі “групы смерці” сталі зборныя Англіі, Харватыі, Украіны, Андоры і Казахстана. Але абражацца на лёс рана, шансы усё ж такі ёсць. І людзі дасведчаныя кажуць аб гэтым цалкам упэўнена, разважаючы пра моцныя і слабыя бакі нашай групы.

Дзмітрый Раўнейка (гулец “Нёмана”, былы гулец зборнай Беларусі):

- Групы ўсе прыблізна роўныя, хоць нашая, як ўсе кажуць, крыху мацнейшая за астатнія.  Есць два відавочныя фаварыты: Харватыя і Англія. У барацьбу за другое месца далучыцца яшчэ і Україна. Ну і Беларусь, я спадзяюся, паспрабуе пазмагацца за высокае месца. Калі казаць пра аўтсайдэраў, то гэта, відавочна, Андора.

Калі ж казаць пра шансы беларусаў, то, як кажуць, перад турнірам шансы ва ўсіх аднолькавыя. Вядома, што харваты і англічане мацнейшыя, але турнір пачнецца толькі ў будучым годзе і хто яго ведае, як тады ўсё складзецца. У любым выпадку трэба ставіць задачу змагацца за адно з двух першых месцаў.

Сяргей Крывец  (гулец моладзевай зборнай і зборнай Беларусі):

Трапілі ў вельмі складаную і вельмі моцную групу. Зборная Англіі – гэта заўсёды фаварыт, заўсёды займае высокія месцы. Улічваючы тое, што яны не патрапілі на чэмпіянат Еўропы, я лічу, што яны будуць старацца рэабілітавацца.

Зборная Харватыі – таксама дастаткова моцная каманда і ў апошні час дэманструе цалкам нядрэнны футбол. Нядаўна яны перамаглі ў вельмі складанай групе і тым самым атрымалі пуцёўку на чэмпіянат Эўропы. Харватаў таксама можна назваць фаварытамі.

Што тычыцца ўкраінцаў, мне задаецца, яны таксама будуць нядрэнна выглядаць. Усё ж такія гульцы, як Шаўчэнка, Варонін, якія гуляюць у наймацнейшых еўрапейскіх клубах, задаюць файны стыль гульні.

Супрацьстаянне Беларусі і Украіны будзе вельмі прынцыповае і будзе выклікаць цікаўнасць у аматараў.

Ну, а Казахстан і Андора хутчэй аўтсайдэры. Андора ніколі высокімі вынікамі не вызначалася. А вось зборная Казахстану – “terra incognita”, каманда нам незнаёмая. Але, на мой погляд, на высокія месцы яны наўрад ці будуць прэтэндаваць. Хоць з іншага боку – гэта футбол і тут магчыма ўсё.

З такой групы цяжка будзе выйсці. Але мэтай павінна быць перамога ў кожнай гульні, а там ужо, калі фартуна будзе на нашым баку, калі кожны будзе выкладвацца і біцца да канца, то, магчыма, нам пашанцуе і мы таксама зможам змагацца за пуцёўку ў Афрыку. Паўтаруся, гэта футбол і тут магчыма ўсё.

Размаўляла Іна ХІТРУШКА