Пакуль гарадзенскі “Нёман” знаходзіўся на зборах у Польшчы, апрабаваць нядаўна заліты гарадзенскі лёд вырашылі хакеісты ленінагорскага “Нафтавіка” (Татарстан). Коўч “нафтавікоў”, Андрэй Кірдзяшоў патлумачыў свой выбар месца для правядзення збораў.

- Па-першае, няма праблем з візамі; па-другое, тут вельмі добрыя ўмовы. Для нас гэты варыянт быў больш прымальным, чым Славакія ці Фінляндыя.

- Андрэй Паўлавіч, а не лягчэй было знайсці спарынг-партнёра дзе-небудзь у Расіі?

- Справа не ў спарынг-партнёры. Патрэбна праца. Гульняў на перадсезоннай падрыхтоўцы ў нас шмат, толькі турніраў, у якіх мы ўдзельнічаем - тры. Нам патрэбны проста добрыя ўмовы для працы. А ў Гародні яны ёсць: тут і футбольнае поле, і бегавыя дарожкі, і добры лядовы палац – і гэта ўсё ў адным месцы. Плюс да ўсяго астатняга ў Беларусі добрае харчаванне. А калі шмат працы, то харчаванне гуляе не апошнюю ролю. І калі казаць пра тую ж Славакію, то харчаванне там нашмат горш, чым у Беларусі.

- А за беларускім чэмпіянатам сочыце?

- Так, сачу. Чэмпіянат Беларусі зараз знаходзіцца на добрым узроўні. Чатыры клубы: “Юнацтва”, “Гомель”, “Керамін” і “Дынама”, на мой погляд, вельмі моцныя. Таксама добры ўзровень гульцоў. Я гляжу гульні вашага чэмпіяната дома па тэлевізары. А таксама ў Гомеле гуляў з мінскім “Дынама”. Вельмі высокі ўзровень.

- Горад ужо паспелі паглядзець? Спадабалася?

- Гулялі па цэнтры. Прыгожы горад. Я быў тут 15 год назад і ў мяне засталіся прыемныя ўспаміны. Можа менавіта таму я і вырашыў прыехаць на зборы ў Гародню.

Вярнуўшыся на радзіму, гарадзенцы прапанавалі “нафтавікам” правесці спарынг. 29-га гарадзенцы цалкам перагулялі “Нафтавік”. Нават функцыянальна “Нёман” глядзеўся нашмат лепш, чым усходнія госці. Ужо на 22–й секундзе гаспадары адкрылі лік. Адзначыцца ўдалося Лісічкіну. Гэтая першая шайба стала і апошняй.

Другая гульня прынесла шмат сюрпрызаў. Першым з іх быў час пачатку гульні – 17.12. Астатнія нечаканасці былі звязаны ўжо не з арганізацыяй, а з настроем ленінагорцаў: хлопцы мелі сур’ёзны намер перамагчы. Але і нёманцы статыстамі не выглядалі. Першымі поспеху дабіліся госці на 10-й хвіліне - пасля паса Іваненкі Хлебнікаў “замахнуўся” на ўладанні Коваля і вымусіў капітуляваць гарадзенскага кіпера. Менш, чым праз хвіліну гаспадары рэабілітаваліся. Калачоў аддаў Арлюку, а той запаліў святло за брамай “нафтавікоў”. У другой двадцаціхвілінцы на апошняй хвіліне  “Нёман” вывеў наперад Лісічкін. А заключная частка складалася з некалькіх акордаў. На сёмай хвіліне зраўняў лік Патапкін. А праз паўтары хвіліны вылучыўся гарадзенскі навабранец Гоман. Ізноў “Нёман” апынуўся наперадзе. Бліжэй да экватару перыяда, здавалася, што, дзякуючы частым выдаленням гасцей, “Нёман” мае шансы павялічыць адрыў у ліку. Але так не лічылі ленінагорцы і на 13-ай хвіліне ўстанавіў раўнавагу Місбахаў. 3:3.

Іна Хітрушка.