Учора дзве самыя ўплывовыя маладзёвыя арганізацыі Беларусі святкавалі юбілеі. Прынцыповыя ідэялагічныя апаненты “нарадзіліся” ў адзін дзень з розніцай у пяць год – “Маладому Фронту” споўнілася  дзесяць год, БРСМ - пяць. Кажуць, нібыта, арганізацыі амаль аднолькавыя, толькі мэты -  дыяметральна супрацьлеглыя. На справе – усё наадварот.

Нават для кіраўніцтва БРСМ не сакрэт, што колькасныя паказчыкі “самай масавай” раздутыя адміністрацыйным рэсурсам. Сяброўства ў саюзе пераўтварылася ў нецікавую фармальнасць у школах, ПТВ і ВНУ. Адзінкі супрацьстаяць – зарабляюць праблемы з адміністрацыяй. Класныя кіраўнікі і куратары, якім непашчасціла апякаць такіх прынцыповых, рызыкуюць застацца без прэмій. Сітуацыя пастаўлена “на паток”. Моладзь, з большага абыякавая да палітыкі, выбірае шлях без перашкодаў. У гэтым – фенамен масавасці. Атрымаўшы чырвона-зялёны ламінаваны білет,чарговы новаспечаны БРСМ-авец кладзе “запаветны” сімвал у далёкі вугал і забывае яго да бліжэйшай генеральнай прыборкі кватэры.

У “Фронта” адміністрацыйнага рэсурса няма. І, відавочна, ня трэба. Тут – рамантыка супраціву, “тусовачнасць” і нефармальнасць арганізацыі. Тут адрэналін несанкцыянаваных акцый і ідэйная згуртаванасць. Феномен “эмэфу” – не ў колькасці, але ў якасці. За гэта маладафронтаўцы расплочваюцца арыштамі, допытамі ў КДБ і, нарэшце, “палітычнымі” справамі з рэальнымі прысудамі. І для кіраўніцтва МФ – не сакрэт, які яперспектывы чакаюць новаспечанага маладафронтаўца пры сённяшняй уладзе.

Але вернемся да мэтаў. Дзеля чаго? Маленькая гульня: адгадайце, якая з гэтых дзвюх арганізацый мае на мэце судзеянне развіццю ў Беларусі грамадскай супольнасці на падставе патрыятычных і духоўных каштоўнасцяў беларускага народа? Адгадалі? БРСМ. Мэта “Маладога Фронту” тая ж самая, толькі Фронт будуе супольнасць на падставах рынку і дэмакратыі. Вядома, поўныя фармуліроўкі статутных мэтаў адрозніваюцца, але, па сутнасці, з іх вынікаюць дзве рэчы: усё – для моладзі, усё – для Беларусі.

Цудоўныя арганізацыі, асабліва калі чытаеш статуты. Мы віншуем усіх змагароў за грамадскую супольнасць, зычым росквіту і дасягнення задэклараваных статутных мэтаў.

Зміцер Ягораў